“შინაგან საქმეთა მინისტრმა, ვახტანგ გომელაურმა თუშეთში, სოფელ ომალოში პოლიციის ახალი შენობა გახსნა“,- ამის შესახებ ინფორმაციას, შინაგან საქმეთა სამინისტრო ავრცელებს.
უწყების ცნობით, ღონისძიებას მინისტრის მოადგილეები, კახეთის პოლიციის დეპარტამენტის, საგანგებო სიტუაციების მართვის სამსახურის და სასაზღვრო პოლიციის ხელმძღვანელები დაესწრნენ.
“ომალოს პოლიციის შენობის მშენებლობა საპოლიციო ინფრასტრუქტურის განახლების პროექტის ფარგლებში განხორციელდა. შენობა სრულად შეესაბამება მაღალმთიანი რეგიონის პირობებს და აღჭურვილია თანამედროვე სტანდარტების შესაბამისად.
თუშეთში, ამ დრომდე სოფელ ომალოში პოლიციის და საგანგებო სიტუაციების მართვის სამსახურის ადგილობრივი დანაყოფის შენობა არ არსებობდა. ტურისტულ სეზონზე, საჭიროების შემთხვევაში, მაშველების გამოძახება ახმეტის მუნიციპალიტეტში განთავსებული დანაყოფიდან ხდებოდა.
ახალ შენობაში პოლიციის და საგანგებო სიტუაციების მართვის სამსახურის თანამშრომლები იმუშავებენ. სამუშაო სივრცის გარდა, ომალოს პოლიციის შენობაში განთავსებულია დასაკითხი, ამოსაცნობი, იარაღის შესანახი და ნივთმტკიცების საცავი ოთახები. შენობა ადაპტირებულია შეზღუდული შესაძლებლობების მქონე პირებისთვის”,- აღნიშნავენ უწყებაში.
მათივე ცნობით, ახალი შენობის დათვალიერების შემდეგ, ვახტანგ გომელაური თუშეთში მომუშავე თანამშრომლებს შეხვდა და მათ სამუშაო პირობებს დეტალურად გაეცნო. შინაგან საქმეთა მინისტრი ომალოში სახელმწიფო საზღვრის ომალოს სექტორის დასაცავ მონაკვეთზე მყოფ მესაზღვრეებს გაესაუბრა. მინისტრმა მაღალმთიანი რეგიონების მოსახლეობისთვის და სახელმწიფოს უსაფრთხოებისთვის მესაზღვრეების, პოლიციელების და მეხანძრე-მაშველის საქმიანობის მნიშვნელობაზე გაამახვილა ყურადღება.
