„მხვდა ბედნიერება და შინაგან საქმეთა სამინისტროში ორი წელი ვიმუშავე. იდეალურად, ზედმიწევნით ვიცი, რას გრძნობს ახლა თითოეული კეთილსინდისიერი პოლიციელი“, – ამის შესახებ საქართველოს პრემიერ-მინისტრმა, გიორგი გახარიამ ზუგდიდში განვითარებულ მოვლენებზე საუბრისას განაცხადა.
„როდესაც მოსახლეობაში პანიკას ვთესავთ, ხვალ, არჩევნები რომ დასრულდება და „ქართული ოცნება“ დამაჯერებლად გაიმარჯვებს, თქვენი და თქვენი ოჯახის წევრების, ჩვენი მოქალაქეების უსაფრთხოება იმავე პოლიციამ უნდა დაიცვას და დარწმუნებული ვარ, თქვენ და თქვენი თანამებრძოლები იქნებით პირველები, როგორც ჯაჭვლიანის შემთხვევაში მოხდა, რომლებიც დასვამენ შეკითხვას ამ „დისკრედიტირებული პოლიციის“ უმოქმედობის გამო. ამ ღონისძიების მეორე ეტაპი გრძელდება და დარწმუნებული ვარ, წარმატებით დასრულდება.
მხვდა ბედნიერება და შინაგან საქმეთა სამინისტროში ორი წელი ვიმუშავე. იდეალურად, ზედმიწევნით ვიცი, რას გრძნობს ახლა თითოეული კეთილსინდისიერი პოლიციელი. მინდა, მათ სრული მხარდაჭერა გამოვუცხადო, ისევე, როგორც თითოეულ სამხედროს, რომლებიც უბრალოდ იმიტომ, რომ სამ დღეში არჩევნებია, უსამართლო ცილისწამების საგნები გახდნენ. ეს ამორალურია. მერწმუნეთ, ეს ტოქსიკური ოთხი-ხუთი დღე მალე გაივლის და ისე არ უნდა მოვიქცეთ, რომ ჩვენი საზოგადოება დავაზიანოთ.
შეუძლებელია, ჯანმრთელ ადამიანს უხაროდეს ის ტრაგედია, რაც ზუგდიდში დატრიალდა. ვხედავთ ჩვენი საზოგადოების გარკვეულ ნაწილს, რომელიც უკიდურესად გულგატეხილი ჩანს იმის გამო, რომ სისხლი არ დაიღვარა და დღეს, მას შემდეგ, რაც სისხლი არ დაიღვარა, დაჟინებით ამხელს პოლიციას, რომ თურმე პოლიცია უუანაროა. ეს ასე არ არის და ამას ჩვენი საზოგადოება სულ მალე დაინახავს. სულ მალე მივხვდებით ამ აჟიოტაჟის და პანიკის ფასს, ზუსტად არჩევნებიდან მეორე-მესამე დღეს“, – განაცხადა გიორგი გახარიამ.
