განათლებისა და ჯანდაცვის სამინისტროების მიერ ახალ სასწავლო წელთან დაკავშირებით შემუშავებულ რეკომენდაციების თანახმად, სკოლებში მოსწავლეებისთვის პირბადის ტარება აუცილებელი არ იქნება.
რეკომენდაციების მიხედვით, სკოლებში აუცულებელი იქნება 1-მეტრიანი დისტანციის დაცვა. ასევე, სკოლებს ეკისრებათ ვალდებულება, პირბადეების რეზერვი ჰქონდეთ.
სკოლის საერთო სარგებლობის სივრცეებში (მათ შორის, დერეფანი, კიბის უჯრედი, სამასწავლებლო და ა.შ.) ყოფნისა და გადაადგილებისას ყველა პირს (გარდა მოსწავლეებისა) უნდა ეკეთოს პირბადე, მათ შორის დასვენებების პერიოდში და სხვ.
გაკვეთილებს შორის ყოველი დასვენების შემდეგ, სველი წერტილები სანიტარულად დამუშავდება , ოთახები კი განიავდება.
„მთავარი პრინციპები უსაფრთხო სასწავლო გარემოსთვის ძირითადად სამი მიმართულებაა, ესენია პირადი დაცვის საშუალებების გამოყენება, პირბადეების შესაფერისი წესით გამოყენება, დისტანციის შენარჩუნება და სანიტარულ-ჰიგიენური ნორმების დაცვა. თითოეული ამ მიმართულებით დეტალური რეკომენდაციები არის ჩაშლილი. რამდენიმე მათგან მინდა გაგიზიაროთ, დისტანცია 1 მეტრი ესაა მინიმალური უსაფრთხო დისტანცია, რომელიც სკოლაში აუცილებლად უნდა იქნას დაცული, პირბადის გამოყენება სასკოლო გარემოში სავალდებულო იქნება ყველა ვიზიტორისთვის, თანამშრომლისთვის, იქ დასაქმებული მასწავლებლებისთვის და სხვა პირებისთვის, გარდა მოსწავლეებისა“, – განაცხადა ჯანდაცვის მინისტრის მოადგილემ თამარ გაბუნიამ.
