სოფელ იყალთოში მომხდარი ავტოსაგზაო შემთხვევის შედეგად დაშავებული ქვეითი, გარდაიცვალა. 38 წლის მამაკაცს, თელავის რეფერალურ საავადმყოფოში მკურნალობდნენ.
საავადმყოფოს მენეჯერის, ხათუნა ჭონიაშვილის განმარტებით, დაშავებულს სიცოცხლესთან შეუთავსებელი ტრამვები ჰქონდა მიღებული.
„გვიან, ღამით შემოიყვანეს პაციენტი, რომელსაც მძიმე ტრავმები ჰქონდა მიღებული. ყველა საჭირო ზომა მივიღეთ, მკურნალობა მაშინვე დავიწყეთ, მაგრამ მისი ტრავმები, სიცოცხლესთან შეუთავსებელი იყო“,- განაცხადა ჭონიაშვილმა.
გარდაცვლილი, 38 წლის ლაშა ნონიაშვილია. ის, წარმოშობით ყვარლის მუნიციპალიტეტიდანაა და სოფელ იყალთოში, კერძო სამუშაოზე იყო ჩასული.
ავტოსაგზაო შემთხვევა თელავის მუნიციპალიტეტის სოფელ იყალთოში, 12 ოქტომბერს მოხდა. გადაჭარბებული სიჩქარით მიმავალი, ავტომანქანა ქვეითს შეეჯახა. შეჯახება იმ დროს მოხდა, როცა ფეხით მიმავალი მამაკაცი, გზის გადაკვეთას ცდილობდა. მძღოლი, შემთხვევის ადგილიდან მიიმალა. მოგვიანებით, ის დააკავეს.
წინასწარი ინფორმაციით, დაკავებული სატრანსპორტო საშუალებას არაფხიზელ მდგომარეობაში მართავდა. გამოძიება მომხდარ ფაქტზე, სისხლის სამართლის კოდექსის 276-ე მუხლის მე-6- ე ნაწილით დაიწყო.
ავტორი: ხათუნა გულიაშვილი
