ამ წუთებში სოფელ ქვედა ჯოჭოში განვითარებული მეწყერული პროცესების შედეგად ტრაგიკულად დაღუპულთა ოჯახის წევრები და ნათესავები საპროტესტო აქციას მართავენ. ისინი ხელვაჩაურის მერის, ჯუმბერ ვარდმანიძისა და გეოლოგიური სამსახურის თანამშრომლების პასუხისგებაში მიცემას მოითხოვენ.
როგორც აქციის მონაწილეები აცხადებენ, ტრაგიკულად დაღუპულმა ლევან თედორაძის ოჯახმა ხელვაჩაურის მერიას დახმარებისთვის არაერთხელ მიმართა, თუმცა თვითმმართველობას რეაგირება არ მოუხდენია.
„ხელვაჩაურის მერის თანამდებობიდან გათავისუფლებას ვითხოვთ. არაერთი მიმართვის მიუხედავად, რვა წლის განმავლობაში მხოლოდ ერთხელ მოვიდნენ გეოლოგები, შეისწავლეს და დასკვნა გააკეთეს, სიცოცხლისთვის საფრთხის შემცველი არ არის აქ ცხოვრებაო. ოჯახი ითხოვდა დახმარებას, მაგრამ არც ხელვაჩაურის მერიამ შეიწუხა თავი და არც გეოლოგიურმა სამსახურმა. შედეგი სახეზეა, ცოცხლად დაიმარხა ოჯახი.
ორ კვირაზე მეტი გავიდა და არავის მოუკითხავს ჩვენი ამბავი. მეტიც, არც სამძიმარზე და არც შემდეგ, არც მერი და არც მერიის წარმომადგენლები არ მოსულან. მერისა და გეოლოგიური სამსახურის უპასუხისმგებლობის გამო, ვინ აგებს პასუხს, ვინ უნდა აიღოს პასუხისმგებლობა? არ დავტოვებთ ამ საქმეს ასე“,- აცხადებს აქციის ერთ-ერთი მონაწილე.
აქციის მონაწილეები ხელვაჩაურის მერ ჯუმბერ ვარდმანიძესთან შეხვედრას მოითხოვენ, წინააღმდეგ შემთხვევაში ისინი დაშლას არ აპირებენ.
ამის პარალელურად, ამ წუთებში ხელვაჩაურის მერიასთან სოფელ ქვედა ჯოჭოს მოსახლეობა იკრიბება. მათი განცხადებით, თუ მერი არ გადადგება, გზას გადაკეტავენ. ჯუმბერ ვარდმანიძე ჯერჯერობით სამსახურში არ მისულა.
ავტორი: ნაირა ქობულაძე
