ჯანდაცვის სამინისტრომ სპორტული დარბაზებისა და ფიტნეს კლუბებისთვის რეკომენდაციები დაამტკიცა. ინფორმაციას ჯანდაცვის სამინისტრო ავრცელებს.
პროტოკოლის თანახმად, სპორტულ-გამაჯანსაღებელ დაწესებულებებში შესვლამდე პერსონალი და მომხმარებელი თერმოსკრინინგს გაივლის. როგორც წესი, შესასვლელში განთავსდება დეზობარიერები.
ასევე, ტრენაჟორებს შორის 2-მეტრიანი დისტანციის დაცვაა საჭირო და დაუშვებელია საერთო სარგებლობის საშხაპეების გამოყენება, თუ საშხაპე კაბინები ერთმანეთისგან იზოლირებული არაა.
საერთო სარგებლობის სივრცეებში, გარდა სავარჯიშო სივრცეებისა, ნიღბების ტარება სავალდებულოა. რეკომენდებულია დახურული სივრცეების ბუნებრივი ვენტილაცია.
თითოეული ვიზიტორისთვის უნდა იყოს განკუთვნილი კარადა, ერთის გამოტოვებით. იკრძალება ბართან საკვებისა და სასმელის მიღება.
ჯგუფური ვარჯიშის დროს, როგორიცაა იოგა, პილატესი და ა.შ. დარბაზში აუცილებელია 2-მეტრიანი დისტანციის დაცვა. ვარჯიშზე ერთდროულად 10 ადამიანზე მეტი არ დაიშვება.
ჯანდაცვის სამინისტროს მიერ გაწერილი რეკომენდაციები დეტალურდ შეგიძლიათ იხილოთ აქ.
