დამახინჯებული ფორმით ინფომაციის გავრცელება, ემსახურება სახელმწიფო უწყებების დისკრედიტაციას და საზოგადოების მიზანმიმართულ შეცდომაში შეყვანას, – ამის შესახებ განცხადებას სახელმწიფო უსაფრთხოების სამსახური ავრცელებს, რომელიც უწყების მიერ ტენდერების გამოცხადების საკითხს ეხება.
უწყების ცნობით, სახელმწიფო უსაფრთხოების სამსახური, ადმინისტრაციული შენობების გამართული ფუნქციონირებისთვის, ყოველწლიურად აცხადებს ტენდერებს.
„სახელმწიფო უსაფრთხოების სამსახური, ადმინისტრაციული შენობების გამართული ფუნქციონირებისთვის, ყოველწლიურად აცხადებს ტენდერებს და აფორმებს ხელშეკრულებებს. მათ შორის არის ფარდა-ჟალუზის ხელშეკრულება, რომლის ჯამური ღირებულება სამოცდაოთხი ათას ლარს შეადგენს. აღნიშნული ხელშეკრულება შედგება 8 პუნქტისგან.
ამ პუნქტებს შორის არის ორი პოზიცია, რომელთა ღირებულება განსაზღვრულია ათას სამასორმოცდაათი ლარით და არა სამოცდაოთხი ათასი ლარით. ხელშეკრულება ასევე, ითვალისწინებს პუნქტს, რომლის მიხედვით მომსახურება გაიწევა 2021 წლიდან, მხოლოდ მოთხოვნის და საჭიროების შემთხვევაში.
აღნიშნული ხელშეკრულების მიხედვით, სახელმწიფო უსაფრთხოების სამსახურის მხრიდან, არც ერთი თეთრი არ არის დახარჯული და მედიასაშუალებით გავრცელებული ინფორმაცია არ შეესაბამება სიმართლეს. გვსურს აღვნიშნოთ, რომ მსგავსი, დამახინჯებული ფორმით ინფომაციის გავრცელება, ემსახურება სახელმწიფო უწყებების დისკრედიტაციას და საზოგადოების მიზანმიმართულ შეცდომაში შეყვანას.
მოვუწოდებთ დაინტერესებულ პირებს მეტი პასუხისმგებლობისა და ინფორმაციის გავრცელებამდე, მისი ჯეროვანი გადამოწმებისაკენ“,- ნათქვამია სუსის მიერ გავრცელებულ განცხადებაში.
