გიორგი ვაშაძის მხარდამჭერებს ფიზიკურად გაუსწორდნენ – შემთხვევა ცოტა ხნის წინ ვარკეთილში მოხდა
ცოტა ხნის წინ, ცნობილი გახდა, რომ ვარკეთილში, გიორგი ვაშაძის მხარდამჭერებს უცნობი პირი თავს დაესხა. სამართალდამცველებმა ინციდენტში მონაწილე ერთი პირი დააკავეს.
„პრაიმტაიმი“ მომხდარზე სასაუბროდ თავად გიორგი ვაშაძეს დაუკავშირდა. როგორც ის აცხადებს, თავდასხმა მის ინიციატივას – საბანკო-საკრედიტო პროცენტების დაკლების მოთხოვნას უკავშირდება. ამბობს, რომ პოლიციამ დააკავა ძალადობაში ეჭვმიტანილი, მაგრამ მისთვის დაკავებულის ვინაობა უცნობია.
„იძულების შემდეგ, როგორც იქნა, პოლიციამ ეს ადამიანი დააკავა. ახლა, მონიტორინგს ვუწევთ, რა ტიპის გამოძიება იქნება. აშკარად, თავდასხმას ორგანიზებული სახე ჰქონდა. თავდამსხმელს ეგონა, რომ ახალგაზრდებს დააშინებდა. პოლიციაც მის დაკავებას არ ჩქარობდა.
თემა ბანკების პროცენტებზე ხელმოწერების შეგროვება იყო. საზოგადოებისთვის ცნობილია, რომ ჩვენ მოვითხოვთ პროცენტის შემცირებას, რომელიც ძალიან მაღალია.
ეს არ მოსწონს ხელისუფლებას და ცდილობენ, თავდასხმით გააჩერონ ჩვენი აქტივობა, რაც შეუძლებელია.
პოლიციამ განყოფილებაში ერთი ადამიანი გადაიყვანა. მან სახელი და გვარი არ გვითხრა. ახლა, პოლიციისგან მოვითხოვთ, რომ მისი ვინაობა გვითხრან, რათა დავადგინოთ წრეები, რომლებთანაც შეხება აქვს.“ – ამბობს გიორგი ვაშაძე.
დაზარალებულების თქმით, თავდამსხმელებმა მათ სიტყვიერი და ფიზიკური შეურაცხყოფა მიაყენეს.
„მოგვაყენეს სიტყვიერი და ფიზიკური შეურაცხყოფა. დააზიანეს მეტროსთან განთავსებული კარავი. გამოვიძახეთ პოლიცია, თუმცა ისინი ნახევარი საათის შემდეგ მოვიდნენ. თავდამსხმელები უკვე გადაიყვანეს პოლიციის განყოფილებაში.“- აცხადებს ერთ-ერთი დაზარალებული.
მომხდარზე შსს-ში აცხადებენ, რომ წვრილმანი ხულიგნობის ბრალდებით, ორი პირი დააკავეს.
„შინაგან საქმეთა სამინისტროს თბილისის პოლიციის დეპარტამენტის ისანი-სამგორის მთავარი სამმართველოს მე-8 სამმართველოს თანამშრომლებმა, წვრილმანი ხულიგნობის ბრალდებით, ორი პირი: 1987 წელს დაბადებული გ.ხ. და 1976 წელს დაბადებული პ.ს. დააკავეს.
მიმდინარე წლის 9 სექტემბერს, თბილისში, მეტროსადგურ „ვარკეთილის” მიმდებარე ტერიტორიაზე, ორმა მოქალაქემ – გ.ხ.-მ და პ.ს.-მ პოლიტიკური პარტია „სტრატეგია აღმაშენებლის” ორ აქტივისტს სიტყვიერი შეურაცხყოფა მიაყენა.
სამართალდამცველებმა ორივე მათგანი შემთხვევის ადგილზევე, ადმინისტრაციულ სამართალდარღვევათა კოდექსის 166-ე მუხლით დააკავეს, რაც წვრილმან ხულიგნობას გულისხმობს.” – აცხადებენ უწყებაში.
მიმდინარე წლის 9 სექტემბერს, თბილისში, მეტროსადგურ “ვარკეთილის” მიმდებარე ტერიტორიაზე, ორმა მოქალაქემ – გ.ხ.-მ და პ.ს.-მ პოლიტიკური პარტია “სტრატეგია აღმაშენებლის” ორ აქტივისტს სიტყვიერი შეურაცხყოფა მიაყენა.
