ციანიდის საქმეში ბრალდებული დეკანოზი გიორგი მამალაძის ძმა, თორნიკე მამალაძე აქციებს აანონსებს.
თორნიკე მამალაძე სოციალურ ქსელში პოსტს აქვეყნებს და აცხადებს, რომ ქვეყანაში პოლიტპატიმრების რაოდენობა გაიზარდა, ამიტომ აუცილებელია პროტესტმა სისტემური ხასიათი მიიღოს. მისი თქმით, ის პარლამენტის შესასვლელთან კარვის გაშლას აპირებს.
„ბოლო პერიოდში, ხელისუფლების მხრიდან პოლიტპატიმართა რაოდენობის კიდევ უფრო გაზრდის შემდეგ, ვთვლი, რომ აუცილებელია პროტესტმა უფრო სისტემური ხასიათი მიიღოს.
ამიტომ ამ დღეებში ვაპირებ პარლამენტის შესასვლელთან კარავი გავშალო, რომელიც ჩემი მხრიდან უშუალოდ პოლიტპატიმართა მიმართ სოლიდარობის გამოხატულება იქნება. მინდა ხაზგასმით აღვნიშნო, რომ პოლიტპატიმართა შორის მე მოვიაზრებ აგრეთვე ჩემს ძმას, დეკანოზ გიორგი მამალაძეს, ვინაიდან ის მმართველ გუნდსა და საპატრიარქოს შორის ბინძური გარიგების მსხვერპლია და ეს გარიგება სწორედ ხელისუფლების პარტიული პოლიტიკის სასარგებლოდ დივიდენდების მიღებას ემსახურებოდა. პროტესტის ამ ფორმით, ასევე, მინდა სტიმული მივცე ოპოზიციას, რათა იყოს თანაბრად პრინციპული ყველა პოლიტპატიმრის გათავისუფლების მოთხოვნისას“, – წერს თორნიკე მამალაძე.
შეგახსენებთ, დეკანოზ გიორგი მამალაძეს პატრიარქის რეფერენტის, შორენა თეთრუაშვილის მკვლელობის მომზადებისა და იარაღის უკანონო შეძენა-შენახვისთვის 9 წლიანი პატიმრობა აქვს მისჯილი.
