„თქვენ ხართ სახელმწიფოს საყრდენი. ქართული ჯარი იდგა და დგას სამშობლოსადმი ერთგულებაზე, თავდადებასა და ღირსებაზე“,- ასე მიმართა საქართველოს პრეზიდენტმა სალომე ზურაბიშვილმა საქართველოს თავდაცვის ძალების მეთაურის უფლებამოსილების გადაბარების ცერემონიალზე ჯარისკაცებს.
როგორც პრეზიდენტმა აღნიშნა, თავდაცვის ძალებისთვის გაძლიერების და განვითარების ახალი ეტაპი იწყება.
„დღეს ქართული ჯარისთვის მნიშვნელოვანი დღეა. დღეს თავდაცვის ძალების უფლებამოსილების გადაბარების დღეა. ეს იმას ნიშნავს, რომ თავდაცვის ძალებისთვის გაძლიერების და განვითარების ახალი ეტაპი იწყება. საქართველოს თავდაცვის ძალების მეთაურის თანამდებობა უაღრესად მნიშვნელოვანია, რადგან მას ევალება ჩვენი თავდაცვის ძალების ოპერატიული მართვა, დაგეგმვა, მზადყოფნა და მთლიანად განვითარება. მეთაურს აბარია უდიდესი პასუხისმგებლობა, მაშინ როცა ქვეყანა უდიდესი გამოწვევების წინაშე დგას, როცა დარღვეულია ქვეყნის სუვერენიტეტი და ტერიტორიული მთლიანობა. როცა მართვაში სამაგალითო მიზანდასახულობა და თანმიმდევრულობა მოგვეთხოვება. ურთულეს გამოწვევებთან გამკლავებისთვის აუცილებელია მომავალზე ორიენტირება, შეუფერხებელი განვითარება და რა თქმა უნდა, მტკიცე ნება საამისოდ. ჩვენ ვართ მომავალზე ორიენტირებული ქვეყანა და გვაქვს ამბიცია მაგალითი მივცეთ სხვებს.
თქვენ ხართ სახელმწიფოს საყრდენი.ქართული ჯარი იდგა და დგას სამშობლოსადმი ერთგულებაზე, თავდადებასა და ღირსებაზე. ქართული ჯარი იყო, არის და იქნება ეროვნული ღირებულებების მატარებელი. ქართული ჯარი არის და იქნება ჩვენი პარტნიორებისთვის საიმედო ძალა“, – განაცხადა სალომე ზურაბიშვილმა.
თავდაცვის ძალების მეთაურის უფლებამოსილება გიორგი მათიაშვილმა გადაიბარა. სალომე ზურაბიშვილმა ყოფილ მეთაურს, გენერალ ვლადიმერ ჩაჩიბაიას მადლობა გადაუხადა.
