ამომრჩევლებს უნდოდათ ოპოზიცია პარლამენტში ყოფილიყო, – ამის შესახებ პარლამენტის წევრმა თამარ ჩუგოშვილმა “პალიტრანიუსის“ გადაცემა “ნიუსრუმში“ განაცხადა.
თამარ ჩუგოშვილი მიიჩნევს, რომ თუ ოპოზიცია პარლამენტში არ შევა და არც ხელახალი არჩევნები დაინიშნება, მაშინ ხელისუფლებას ვეღარაფერი დააბალანსებს, ხოლო ოპოზიცია ქუჩის ოპოზიციად გადაიქცევა, რაც ძალიან ცუდი პროცესების გამომწვევი იქნება.
“ოპოზიცია ფიქრობს, რომ ვადამდელ არჩევნებს მიაღწევს, თუკი ახლა არ შევა პარლამენტში, მაგრამ ჩვენ არ ვიცით, ეს რამდენად არის გარანტირებული. დღეს არის ასეთი მოცემულობა – ყველა მნიშვნელოვანი გარე აქტორის მხრიდან ოპოზიციის მიმართ არის მოწოდება: გავიგეთ, რომ არჩევნები ცუდად ჩატარდა, ეს არის ცუდი და უნდა გადაიდგას ნაბიჯები, რომ ეს გამოსწორდეს, მაგრამ ევროპარლამენტი, აშშ-ი, ეუთო, ევროსაბჭო ოპოზიციას მაინც მოუწოდებს, რომ პარლამენტის გზით იარონ. მეორე გზა არის, რომ შეიძლება გარედან მოგიწოდონ პარლამენტში შესვლაზე, მაგრამ უფრო მნიშვნელოვანია საზოგადოების დამოკიდებულბა, ის თუ რას ფიქრობს ხალხი. თუკი ხალხის უდიდესი ნაწილის მოთხოვნაა ვადამდელი საპარლამენტო არჩევნების ჩატარება, რადგან ჩატარებულმა არჩევნებმა მათი ნება არ გამოხატა, მაშინ ეს საზოგადოების მხრიდან სხვადასხვა ფორმით უნდა გამოიხატოს. მხოლოდ პარტიის აქტივისტების შეკრება ამისთვის საკმარისი არ არის – ეს სხვა ფორმებითა და მასშტაბით უნდა გამოჩნდეს. ჩემი განცდააა, რომ დღეს მოსახლეობას ყველაზე მეტად არასტაბილურობის, მძიმე კრიზისებისა და დესტაბილიზაციის ეშინია. მთავარი შიში არის დესტაბილიზაციის შიში. ამიტომ ამ მოცემულობაში, როდესაც არ არის გარე მხარდაჭერა, ხოლო ქვეყნის შიგნით არის დესტაბილიზაციის შიში, ეს რამდენად დაეხმარება ოპოზიციას, რომ ვადამდელი არჩევნების ჩატარება მოახერხონ, არ ვიცით“, – განაცხადა თამარ ჩუგოშვილმა.
