საპარლამენტო უმრავლესობის წარმომადგენელი, დმანისი-წალკის მაჟორიტარი დეპუტატი კახა ოქრიაშვილი 2020 წლის საპარლამენტო არჩევნებში მაჟორიტარობისთვის დამოუკიდებლად იბრძოლებს, თუ მმართველმა პარტიამ მხარი არ დაუჭირა. ამის შესახებ ოქრიაშვილმა „პრაიმტაიმთან“ განაცხადა.
„წარმოდგენა არა მაქვს, დამიჭერს თუ არა მხარს „ქართული ოცნება“ საპარლამენტო არჩევნებში. თუ დამიჭერს მხარს – დამიჭერს, თუ არა, წავალ დამოუკიდებლად.
2003 წელს მე პოლიტიკაში მოვედი, როგორც საინიციატივო ჯგუფის მიერ წარდგენილი კანდიდატი. არც ერთ პარტიასთან ვყოფილვარ ასოცირებული. მოვედი დავამარცხე სამთავრობო კანდიდატი – გენერალური პროკურორის მოადგილე“,- განაცხადა ოქრიაშვილმა.
ოქრიაშვილი მიიჩნევს, რომ მოქმედ მაჟორიტარებს საკონსტიტუციო ცვლილებებისთვის მხარი არ უნდა დაეჭირათ.
„ლოგიკა იმაშია, რომ მე უნდა დავაპირო მაჟორიტარობა, თორემ იქ მაჟორიტარები სხედან და წევენ მწვანე ღილაკს, რომ მაჟორიტარობა გააუუქმონ საერთოდ მოსახლეობას პრივილეგია, რომ საკუთარი დეპუტატი ჰყავდეს – ისინი როგორ უნდა მივიდნენ მოსახლეობაში, ძალიან მაინტერესებს. ვფიქრობ, რომ ალბათ, ნამუსი გვერდზე უნდა გადადონ, ნამუსით იქ ვერ მივლენ“,- განაცხადა მან.
ინფორმაციისთვის, დღეს პარლამენტმა საკონსტიტუციო ცვლილებების განხორციელებას მხარი დაუჭირა.
