2020 წლის 28 დეკემბრიდან კორონავირუსის პანდემიის გამო თურქეთის რესპუბლიკაში შესვლა-გამოსვლის ახალი რეგულაციები წესდება. ამის შესახებ განჩხადებას ბათუმში თურქეთის საკონსულო ავრცელებს.
თურქეთის საკონსულოს ინფორმაციით, SARS-CoV-2 ვირუსის გამო დაწესებული აღნიშნული რეგულაცია 2021 წლის 1 მარტამდე გაგრძელდება.
ახალი რეგულაციის თანახმად, 28 დეკემბრიდან უცხოეთიდან საჰაერო გზით, ხოლო 30 დეკემბრიდან სახმელეთო, საჰაერო და საზღვაო გზებით თურქეთში შესულმა პირებმა უნდა წარადგინონ ბოლო 72 საათის განმავლობაში ჩატარებული ტესტის უარყოფითი პასუხი.
“ბოლო პერიოდში ინგლისში დაფიქსირებულ ვირუსის მუტაციური ფორმის SARS-CoV-2-ის შემთხვევების მატების გამო, ვირუსის თურქეთში შეღწევის პრევენციის მიზნით 2020 წლის 28 დეკემბრიდან უცხოეთიდან საჰაერო გზით, ხოლო 30 დეკემბრიდან სახმელეთო, საჰაერო და საზღვაო გზებით თურქეთში შემოსულმა პირებმა ქვეყანაში შემოსვლისას უნდა წარმოადგინონ ბოლო 72 საათის განმავლობაში გაკეთებული SARS-CoV-2 ტესტის უარყოფითი პასუხი. ისინი, ვინც არ წარმოადგენენ PCR ტესტის უარყოფით პასუხს, დაექვემდებარებიან კარანტინის გავლას მათ მიერ გაცხადებულ მისამართზე (სახლი, სასტუმრო და ა.შ.), ხოლო ვისაც არ ექნებათ გასაჩერებელი ადგილი, განთავსდებიან რეგიონის ჯანდაცვის დირექტორატის მიერ განსაზღვრულ საკარანტინო სივრცეებში. საკარანტინო ვადის მე-7 დღეს, ვისაც ექნება უარყოფითი პასუხი PCR ტესტზე, მათთვის მე-7 დღის ბოლოს დასრულებულად ჩაითვლება საკარანტინო ვადა, ხოლო ვისაც PCR ტესტის პასუხი ექნება დადებითი, ის მკურნალობას გააგრძელებს ჯანმრთელობის დაცვის სამინისტროს COVID-19 პროტოკოლის შესაბამისად”- აღნიშნულია განცხადებაში.
