ოკუპირებული ცხინვალის დე-ფაქტო პროკურატურის ინფორმაციით, რუსეთიდან ექსტრადირებულია 1981 წელს დაბადებული თემურ ძაფაროვი(ჯაფარიძე), რომელიც ბრალდებულია 2002 წელს, ცხინვალის ბაზრის მახლობლად ჯგუფურ შეიარაღებულ თავდასხმაში, ყაჩაღობაში, ორი, ან მეტი პირის მკვლელობასა და იარაღის უკანონოდ შეძენა-ტარებაში. ინფორმაციას cominf-ი ავრცელებს.
დანაშაულის ჩადენის შემდეგ ძაპაროვმა ე.წ. „სამხრეთ ოსეთის რესპუბლიკა“ დატოვა :
„არსებული ინფორმაციით, ძაფაროვი საქართველოს ტერიტორიაზე იმალებოდა. მას ახლო კავშირი ჰქონდა საქართველოს სამხედრო-პოლიტიკურ ხელმძღვანელობასთან და ირიცხებოდა ექს-პრეზიდენტ მიხეილ სააკაშვილის პირად დაცვაში. საქართველოში ხელისუფლების შეცვლის შემდეგ, ძაფაროვმა პირადი მონაცემები შეიცვალა, რუსეთში გაემგზავრა და მოსკოვის ოლქის ერთ-ერთ სოფელში იმალებოდა თემურ ბატეევის სახელით. ძებნილი ძაფაროვი რუსმა სამართალდამცავებმა 2019 წლის ნოემბერში დააკავეს“,- ნათქვამია განცხადებაში.
