რამდენიმე საათის წინ ზუგდიდში, წმინდა ნინოს ქუჩაზე ინციდენტი მოხდა.
არსებული ინფორმაციით, ზუგდიდელმა პოლიციელმა მოქალაქეზე ფიზიკურად იძალადა. დაზარალებული გელა სიჭინავას დედა ჰყვება, რომ პატრულის მოქმედი თანამშრომელი გოჩა გუჯეჯიანი მის შვილს რკინის ხელკეტით გაუსწორდა.
ფიზიკურ დაპირისპირებას კი წინ სიტყვიერი შელაპარაკება უძღოდა.
ინციდენტის დროს, გელა სიჭინავა გამოესარჩლა მამას, რომელიც მანქანის ხელოსანია და სწორედ საპატრულო პოლიციელის გუჯეჯიანის ბიძა იყო მამისის კლიენტი.
როგორც დაზარალებულ გელა სიჭინავას დედა ამბობს, გუჯეჯიანის ბიძა ერთი წლის შემდეგ მოვიდა მის მეუღლესთან და ფულის გადახდის გარეშე მანქანის ხელახლა შეკეთება მოსთხოვა. კლიენტი მოქმედი პოლიციელის გოჩა გუჯეჯიანის ბიძა აღმოჩნდა.
მომხდარს უარყოფს გოჩა გუჯეჯიანის დედა და ამბობს, რომ მის შვილს ფიზიკურად თავად გელა სიჭინავა გაუსწორდა.
გელა სიჭინავას მძიმე, მრავლობითი დაზიანებები თავის არეში აქვს მიყენებული. მას სასწრაფო დახმარების გამოძახება და ზუგდიდის რეფერალურ ჰოსპიტალში გადაყვანა დასჭირდა.
ცოტა ხნის წინ კი ის საავადმყოფოდან სამართალდამცავებმა გამოიყვანეს. იგი ამ წუთებში პოლიციის სამმართველოში იკითხება.
მომხდარზე საქართველოს პროკურატურა განცხადებას ავრცელებს:
„სამეგრელო-ზემო სვანეთის საოლქო პროკურატურის საგამოძიებო სამმართველოში 27 ოქტომბერს, საპატრულო პოლიციის თანამშრომლის კ.გ.-ს მიერ მოქალაქე გ.ს.-ს ცემის ფაქტზე, საქართველოს სისხლის სამართლის კოდექსის 126-ე მუხლის პირველი ნაწილით გამოძიება დაიწყო.
გამოძიების მიერ ამ ეტაპზე დადგენილია, რომ 27 ოქტომბერს ქალაქ ზუგდიდში გ.ს.-ს და კ.გ.-ს შორის, რომელიც აღნიშნულ დროს არ ასრულებდა სამსახურებრივ მოვალეობას, ავტომანქანის შეკეთების თაობაზე წარმოშობილი ურთიერთშელაპარაკება ფიზიკურ დაპირისპირებაში გადაიზარდა.
გამოძიების მიერ ამ ეტაპისთვის დაზარალებულად ცნობილია და გამოკითხულია გ.ს. მიღებული დაზიანების ხარისხის განსაზღვრისათვის დანიშნულია სასამართლო-სამედიცინო ექსპერტიზა. მიმდინარეობს თვითმხილველი მოწმეების გამოკითხვა.
სისხლის სამართლის საქმეზე გამოძიება გრძელდება“, – ნათქვამია პროკურატურის მიერ გავრცელებულ განცხადებაში.
ავტორი: თეა შონია
