„ცუდის ნიშანია, რომ ქალაქში მიუსაფარ ძაღლებში გამოჩნდა ცოფი“, – ამის შესახებ დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ განაცხადა.
მისივე თქმით, ცოფის ვირუსი ერთადერთი დაავადებაა, რომელიც არ იკურნება და ფატალური შედეგით სრულდება. ამიტომ, პრევენციის ერთადერთი საშუალება კბენის ან დადორბვლის შემთხვევაში ადამიანის დროული ვაქცინაციაა.
„ცოფი არის ერთადერთი დაავადება, რომელიც 100%-ით არის სასიკვდილო. ჯერჯერობით, კაცობრიობამ ცოფის საწინააღმდეგოდ ვერც ერთი წამალი ვერ გამოიგონა. ცოფი თუ განვითარდა ადამიანში, სამწუხაროდ, ვერაფერს ვერ უშველით. ერთ-ერთი ყველაზე დიდი აღმოჩენა, რაც კაცობრიობის და მედიცინის ისტორიაში არის, ცოფის საწინააღმდეგო ვაქცინის შექმნაა. ამ მიმართულებით ჩვენ მნიშვნელოვანი ნაბიჯები გადავდგით. 2014 წელს სოფლის მეურნეობის სამინისტრომ მაქსიმალური რაოდენობით აცრა მიუსაფარი ძაღლები. ამისთვის ყოველწლიურად საკმაოდ დიდი თანხები იხარჯება. როდესაც ნებისმიერი ძაღლი დაკბენს, ან გაკაწრავს ადამიანს, მომენტალურად ხდება ვაქცინაცია. 2015-17 წლებში ცოფის შემთხვევა არ გვქონია. 2018 წელს დაფიქსირდა 2 შემთხვევა, საიდანაც 1 შემთხვევა ოკუპირებულ აფხაზეთის ტერიტორიაზე იყო. 2019 წელს გვქონდა 1 შემთხვევა, ისიც ოკუპირებული ტერიტორიიდან.
დაავადებათა კონტროლის ეროვნული ცენტრის ხელმძღვანელის ინფორმაციით, 2020 წელს საქართველოში ცოფის შემთხვევები ჯერჯერობით არ დაფიქსირებულა, თუმცა ვირუსის ნიშნები შეინიშნება მიუსაფარ ძაღლებში. გამყრელიძე შესაბამის სამსახურებს ვაქცინაციის მიმართულებით, კონტროლის გაძლიერებისკენ მოუწოდებს.
ასევე ნახეთ: მსხვერპლის 40% მოდის 15 წლამდე ბავშვებზე! – როგორ დავიცვათ თავი ცოფიანი ძაღლებისა და შხამიანი გველებისგან
„2020 წელს ადამიანებში ცოფის შემთხვევა ჯერჯერობით არ დაფიქსირებულა, მაგრამ ცუდის ნიშანია, რომ ქალაქში მიუსაფარ ძაღლებში გამოჩნდა ცოფი. კიდევ ერთხელ მოვუწოდებ შესაბამის სამსახურებს, რომ გააქტიურონ კვლევები და მოხდეს მაწანწალა ძაღლების ვაქცინაცია. ადამიანებმა კი უცნობი ძაღლის მიერ გაკაწვრის ან დადორბვლის შემთხვევაში აუცილებლად უნდა მიმართონ სამედიცინო დაწესებულებებს“, – განმარტავს გამყრელიძე.
არსებობს შემთხვევები, როცა ადამიანები ცოფზე წინასწარ იკეთებენ ვაქცინას, მაგალითად: ზოოპარკის თანამშრომლები, მონადირეები და ა.შ. ვაქცინაცია უნდა მოხდეს მხოლოდ მაშინ, როდესაც ადამიანი დაიკბინება ან დაიდორბლება უცნობი ცხოველის მიერ. ამასთან, უნდა მიუსაფარ ძაღლებთან მიმართბით უნდა გაძლიერდეს ღონისძიებები შესაბამისი სამსახურების მიერ. ქუჩაში ე.წ. მაწანწალა ძაღლები არ უნდა დადიოდნენ, რადგან ისინი მოსახლეობისთვის საფრთხეს წარმოადგენენ. არსებობს სპეციალური იზოლატორები, სადაც შესაძლებელი იქნება მათი მოთავსება და იქ კარგად მოუვლიან“, – განაცხადა ამირან გამყრელიძემ.
