მას შემდეგ რაც ცნობილი გახდა, რომ „ტვ პირველის“ თანამშრომელს ვიკა ბუკიას კორონავირუსი დაუდგინდა, ტელეკომპანიის ხელმძღვანელობამ დაავადებათა კონტროლის ეროვნულ ცენტრს რეკომენდაციების მისაღებად მიმართა.
ინგა გრიგოლიას განცხადებით მათ უწყებიდან ასეთი პასუხი მიიღეს, დღის მეორე ნახევრამდე „ტვ პირველის“ თანამშრომლები უნდა ყოფილიყვნენ თვითმონიტორინგის რეჟიმში. მისივე თქმით, ხვალ დილიდან ტელევიზიის ყველა თანამშრომელს ჩაუტარდება სწრაფი ტესტირება.
„დაავადებათა კონტროლის ეროვნული ცენტრიდან მითხრეს, რომ ტელევიზიის თანამშრომლები ხვალ შუადღემდე უნდა ვიყოთ თვითმონიტორინგის რეჟიმში. სიმართლე გითხრათ ვერ გავიგე, რას ნიშნავს თვითმონიტორინგის რეჟიმში ყოფნა.
ჩვენ ვერ დაველოდებით როდის გადაწყვეტს სახელმწიფო ჩაგვიტაროს თუ არა ტესტირება, რადგან 300-ზე მეტი ადამიანი მუშაობს ტელეკომპანიაში. ამიტომ კომპანიამ მიიღო გადაწყვეტილება და ხვალ დილის ათის ნახევრიდან ყველა ჩვენს თანამშრომელს გავუკეთებთ ტესტირებას, რადგან ჩვენ პირველ რიგში ვალდებულება გვაქვს თანამშრომლების მიმართ, ასევე იმ ადამიანებთან, ვისთანაც ჩვენი ჟურნალისტები და ოპერატორები მიდიან.“ – განაცხადა ინგა გრიგოლიამ.
შეგახსენებთ, რომ ლევან გოგიჩაიშვილსა და მის მეუღლეს, “ტვ პირველის” ჟურნალისტს, ახალი კორონავირუსი დღეს დაუდასტურდათ.
