„მოგეხსენებათ 8:00 საათზე იხსნება საარჩევნო უბნები, ერთეული უბნების გახსნა ვერ მოხერხდა უამინდობის გამო“, – ამის შესახებ ცესკოში გამართულ ბრიფინგზე, ცესკო-ს პრეს-სპიკერმა ნათია იოსელიანმა განაცხადა.
„ხადას ხეობაში შედარებით გვიან გაიხსნა საარჩევნო უბანი (11.28.33); რაც შეეხება შატილს, აქ ვერ იხსნება უბანი (11.28.34), ვინაიდან ვერტმფრენი უამინდობის გამო ვერ გადაიყვანს კომისიის წევრებს ადგილზე. მინდა მოგაწოდოთ ინფორმაცია გუდაურზეც, იგივე მიზეზის გამო ვერ იხსნება სპეციალურად შექმნილი უბანი (11.29.10), სადაც 19 ამომრჩეველია და ასევე ჩვეულებრივი უბანი 11.29.12, სადაც 205 ამომრჩეველია. ეს ბოლო ორი უბანი შესაძლებელია მოგვიანებით გაიხსნას.
გარდა ზემოაღნიშნულისა, 08:00 საათზე ყველა საარჩევნო უბანი მზად იყო პირველი ამომრჩევლის მისაღებად. თითოეულ უბანზე დაცულია სანიტარიულ-ჰიგიენური ნორმები; კენჭისყრის პროცესი მიმდინარეობს და ჩვენ მოვუწოდებთ ამომრჩევლებს აქტიურად მიიღონ მონაწილეობა საქართველოს პარლამენტის არჩევნების მეორე ტურში. რაც შეეხება სტაციონარულ სამკურნალო დაწესებულებებსა და იზოლაციაში მყოფი ამომრჩევლების არჩევნებში მონაწილეობას, მათი კონსტიტუციური უფლების უზრუნველყოფის მიზნით შექმნილი 80 სპეციალური უბნის 145 გადასატანი საარჩევნო ყუთი დღის განმავლობაში მოემსახურება აღნიშნულ ამომრჩევლებს“, – განაცხადა ნათია იოსელიანმა.
