პარტია „ერთიანი საქართველოს“ ლიდერი, ნინო ბურჯანაძე აცხადებს, რომ თუკი ინფიცირებულთა რაოდენობის ზრდა არსებულ ტემპში გაგრძელდება და შეზღუდვები მოიმატებს, პოლიტიკურმა სპექტრმა არჩევნების გადადებაზე ფიქრი უნდა დაიწყოს.

„ინფიცირების მატება, ჩაკეტილი სივრცეების და შეზღუდვების რაოდენობა თუ ასე გაგრძელდა, მაშინ სერიოზულად უნდა ვიფიქროთ არჩევნების გადადებაზე.

ამ ვითარებაში არჩევნების ჩატარება შეუძლია მხოლოდ ხელისუფლებას, რომელსაც აქვს ადმინისტრაციული რესურსი, რომელსაც ადგილზე ჰყავს პოლიცია, სუს-ი, კუდ-ი, გამგეობა და ა.შ, რომლებიც პირდაპირ, ვერტიკალით აძლევენ დავალებებს ქვეშევრდომებს, რათა იმოქმედონ ისე როგორც ხელისუფლებას აწყობს, ხოლო ოპოზიცია მოკლებულია ადამიანებთან პირდაპირი კონტაქტის შესაძლებლობას“. – თქვა ნინო ბურჯანაძემ „პალიტრანიუსზე“ მერაბ მეტრეველის გადაცემაში.

შეგახსენებთ, 9 სექტემბერს საქართველოში კორონავირუსის 44 ახალი შემთხვევა გამოვლინდა და ინფიცირების დადასტურებულ შემთხვევათა რაოდენობა 1773-მდე გაიზარდა.

ამავე დღეს, მთავრობამ ახალი შეზღუდვები შემოიღო – აიკრძალა 200-ზე მეტი ადამიანის შეკრება სპორტულ და კულტურულ ღონისძიებებზე, ასევე ღია და დახურულ დაწესებულებებში.

შეზღუდვები არ ვრცელდება მხოლოდ პოლიტიკურ თავშეყრაზე, საარჩევნო აგიტაციასა და არჩევნებთან დაკავშირებულ ღონისძიებებზე.

საქართველოს პრეზიდენტის სალომე ზურაბიშვილის ბრძანებით, 31 ოქტომბერს საპარლამენტო არჩევნები გაიმართება.