„უვადოდ ხომ არ გავაუქმოთ პარლამენტი?! საერთოდ პარლამენტს ხომ არ ჩამოვართვათ უფლება, აკონტროლოს მთავრობა?! და საპარლამენტო ქვეყანაც, ეტყობა, არ მოგწონთ“, – ასე მიმართა დამოუკიდებელმა დეპუტატმა ეკა ბესელიამ დიმიტრი ხუნდაძეს პარლამენტის რიგგარეშე სესიაზე.
როგორც მან პარლამენტში კითხვის დასმის დროს აღნიშნა, ეს საპარლამენტო რესპუბლიკაა, სადაც პარლამენტი ასეთ შეზღუდვებზე კონტროლს უწესებს მთავრობას.
„ამ პარლამენტში არავინ არ არის, ვინც ჯანდაცვის შესახებ კანონი წაიკითხა ? ვინ გითხრათ, რომ საზღვრები არ კონტროლდება ამ ცვლილებების გარეშე. რას გვეუბნებით პარლამენტის წევრებს, რომ თუ ეს კანონი არ მივიღეთ, საზღვარი არ კონტროლდება? თუ სპეციალური სერვისცენტრების მომსახურება არ შეიძლება და სერვისის მიწოდება?
წამიკითხეთ კანონში ის ნორმა, რომელიც, თუ ეს ცვლილება არ იქნება მიღებული, შესაძლებლობას არ აძლევს მთავრობას დაიცვას მოქალაქე თუ მისი ჯანმრთელობის მდგომარეობა არის საფრთხის ქვეშ. მოქალაქეები საკუთარ თავს თვითონ ძალიან კარგად იცავენ, ექიმები ძალიან კარგად მუშაობენ“,- განაცხადა ეკა ბესელიამ.
ცნობისთვის, ამ წუთებში პარლამენტში „საზოგადოებრივი ჯანმრთელობის შესახებ“ კანონს განიხილავენ.
პარლამენტმა აღნიშნული კანონი კორონავირუსის წინააღმდეგ ბრძოლის მიზნით მიიღო და კონკრეტული ღონისძიებები განსაზღვრა, რომელთა მოქმედების ვადად 2020 წლის 15 ივლისი განისაზღვრა.
კანონის მიხედვით, მთავრობას შემზღუდავი ღონისძიებების გატარება საგანგებო მდგომარეობის გამოცხაების გარეშეც შეეძლება.
