დღეს, შინაგან საქმეთა მინისტრის – ვახტანგ გომელაურის ბრძანებით, ყველა ოპერატორი მადლობის სიგელით დაჯილდოვდა. ინფორმაციას აღნიშნული სამინისტრო ავრცელებს.
2009 წლიდან, მსოფლიოს 80-ზე მეტი ქვეყანა და მათ შორის ევროკავშირის წევრი ქვეყნები და საქართველო, 11 თებერვალს „112“-ის დღეს აღნიშნავს.
112-ის დღესთან დაკავშირებით, შინაგან საქმეთა მინისტრის მოადგილე – გიორგი ბუთხუზმა საზოგადოებრივი უსაფრთხოების მართვის ცენტრი „112“-ის თბილისის ცენტრი მოინახულა და „112“-ის თანამშრომლებს “პანდემიის დროს განსაკუთრებულ რეჟიმში თავდაუზოგავად მუშაობისთვის, სამსახურებრივი მოვალეობის სანიმუშოდ შესრულებისა და საზოგადოებრივი უსაფრთხოების მართვის ცენტრის ეფექტურ მუშაობაში შეტანილი წვლილისთვის” მინისტრის მადლობის სიგელები გადასცა. უნდა აღინიშნოს ისიც, რომ რუსთავის ცენტრის უფროსს „განსაკუთრებული დამსახურებისათვის“ სამინისტროს მედალიონი გადაეცა.
“როგორც მოგეხსენებათ, პანდემიის პერიოდში 112-ს მნიშვნელოვანი ფუნქცია დაემატა, თითოეულ მოქალაქეს ვირუსის დადასტურების შემთხვევაში შეუძლია დარეკოს 112-ზე. 2020 წელს ოპერატორებმა 7 მილიონამდე ზარს უპასუხეს. აღნიშნულიდან გამომდინარე, ზარების ეფექტური მართვისთვის და გადაუდებელი დახმარების ნომერთან შეუფერხებლად დაკავშირებისთვის 112-ში ოპერატორების რაოდენობა 115%-ით გაიზარდა” – წერია განცხადებაში.
