გაერთიანებული სამეფოს შინაგან საქმეთა მდივნის, პრიტი პატელის თქმით, კორონავირუსით მაღალი სიკვდილიანობის მაჩვენებლის გამო, ქვეყანაში არსებული შეზღუდვების შემსუბუქებაზე ფიქრი ჯერ ძალიან ადრეა. ინფორმაციას CNN იუწყება.

„ჩვენ ვერ ვისაუბრებთ შეზღუდვების შემსუბუქებაზე იქამდე, სანამ ზუსტად არ გვეცოდინება, რომ პრიორიტეტული ჯგუფები უკვე ვაქცინირებულია“ – განაცხადა შინაგან საქმეთა მდივანმა.

სამშაბათის მონაცემებით, გაერთიანებულმა სამეფომ კორონავირუსით გარდაცვალებულთა დღიური მონაცემებით, ანტირეკორდული მაჩვენებელი – 1 610 ახალი შემთხვევა აღრიცხა.

ამ დროისთვის, Worldometer-ის მიხედვით, პანდემიის დაწყებიდან, სულ 3 466 849 ადამიანი დაინფიცირდა. გამოჯანმრთელდა – 1 558 503, ხოლო ვირუსის გამო გარდაიცვალა – 91,470.