„ატლანტიკური საბჭოს“ მიერ ორგანიზებულ ღონისძიებაზე, NATO-ს გენერალური მდივნის ყოფილმა მოადგილემ, ალექსანდერ ვერშბოუმ განაცხადა, რომ უკრაინის და საქართველოს NATO-ში გაწევრიანებისთვის, შესაძლოა კარგი იყოს ახალი სტატუსის შექმნა, მაგალითად, ასოცირებული წევრის სტატუსი. ვერშბოუს კომენტარს „ამერიკის ხმის“ ქართული რედაქცია ავრცელებს.
„ჩვენ პირობა დავდეთ, რომ უკრაინა და საქართველო ს წევრები გახდებიან, მაგრამ ვერ გავითვალისწინეთ, როგორ შეიძლება მივაღწიოთ ამას. შესაძლოა ეს მოხერხდეს რაიმე ახალი, ასოცირებული წევრის სტატუსის შექმნით, უკრაინისთვის და საქართველოსთვის“, – განაცხადა ვერშბოუმ.
როგორც ვერშბოუ ამბობს, მოსკოვთან სამომავლო უკეთესი ურთიერთობების სამსახვერპლოზე, დასავლეთმა რუსეთის მეზობელი ქვეყნები არ უნდა შეწიროს. NATO-ს გენერალური მდივნის ყოფილი მოადგილე საქართველოს, უკრაინისა და ბელარუსის მიმართ დახმარების გაზრდაზეც საუბრობს.
„მოსკოვთან უკეთესი ურთიერთობების სამსხვერპლოზე, ნუ შეწირავთ სხვა ქვეყნებს. წინააღმდეგობა უნდა გავუწიოთ რუსულ აგრესიას ყველა სფეროში, NATO-ს გაძლიერების საშუალებით. პოლიტიკური ჩარევისგან თავის დაცვასა და კიბერუსაფრთხოების შექმნაში, უნდა დავეხმაროთ უკრაინას, საქართველოსა და ახლა უკვე ბელარუსს, რათა დაიცვან საკუთარი სუვერენიტეტი. რუსეთის აგრესიული ქცევის საწინააღმდეგოდ, უნდა გავზარდოთ ხარჯები“,- განაცხადა ვერშბოუმ.
ქართველი ექსპერტები ამბობენ, რომ ევროპას საქართველოს NATO -ში გაწევრიანების ასეთი დიდი სურვილი რომ აქვს რუსეთის აქტიურობის „დამსახურებაა“. განსაკუთრებით, მას შემდეგ, რაც ყარაბაღის კონფლიქტისისას რეგიონში ყველაზე მოგებული რუსეთი დარჩა. მათი თქმით, ევროპა, ამ ფორმით საკუთარი უსაფრთხოების უზრუნველსაყოფად ფიქრობს.
როგორც ისინი ამბობენ, პომპეოს ტურნეში საქართველოს ჩასმაც, სწორედ იმის ხაზგასასმელად იყო, რომ დასავლეთისთვის და განსაკუთრებით, აშშ-ისთვის სულერთი არ არის, რა მოხდება სამხრეთ კავკასიაში და განსაკუთრებით, საქართველოში.
