ეკა ბესელია, პირადი ცხოვრების ამსახველი კადრების გავრცელების საქმესთან დაკავშირებით, პრემიერს პასუხს სთხოვს. როგორც დამოუკიდებელმა დეპუტატმა განაცხადა, გიორგი გახარია მას დაჰპირდა, რომ ამ საქმესთან დაკავშირებით კითხვებზე პასუხს გასცემდა, თუმცა მას შემდეგ 1 წელზე მეტი გავიდა.
„ეს ბოლო ანგარიშია ამ მოწვევის პარლამენტში და არ მინდა პარლამენტი ისე დასრულდეს, რომ ეს კითხვა არ დავსვა, რომელზე პასუხსაც თქვენ დამპირდით. ეს არის კითხვა, რომელმაც ბევრი რამ შემიცვალა. აქ არიან მთავრობის წევრები, რომლებსაც, შესაძლოა იყვნენ დაკავშირებულები ამ საკითხთან.
ამ საანგარიშო პერიოდში თქვენ იყავით შსს მინისტრი, როდესაც იმ უმრავლესობის დეპუტატის მიმართ გავრცელდა მიხეილ სააკაშვილის ხელისუფლების დროს ჩაწერილი უკანონო ჩანაწერები. დღეს არის ივნისის ბოლო და გავიდა წელიწადი და 5 თვე. თქვენ თქვით, რომ მეტყოდით, ვინ ჩაიდინა ეს დანაშაული. არ მითხრა, რომ ეს საქმე გახსნილია, იმიტომ რომ ის გახსნილი არ არის და ამ კითხვაზე პასუხი ჯერ არ მიმიღია.
გეკითხებით ახლა. ვინ დაგეგმა ის დანაშაული და რა მიზანი ჰქონდა მის დაგეგმვას და რატომ დაემთხვა ეს იმ პერიოდს, როცა ჩვენ გვქონდა უმწვავესი კონფლიქტი მოსამართლის 10-კაციანი სიის გამო. რა იყო ეს. ეს იყო დასჯა, სამაგიეროს გადახდა, ანგარიშსწორება თუ გაფრთხილება ყველა დანარჩენის მიმართ, ვინც გაბედავდა და აირჩევდა პროტესტის იმ ფორმას, რაც მე ავირჩიე.
მე ამ კითხვაზე პასუხს აუცილებლად მივიღებ. რა დროც არ უნდ დასჭირდეს ამას. არ დავიღლები იქამდე, ვიდრე არ გავიგებ კონკრეტულ სახელს და გვარს და ეს იმისთვის, რომ ელემენტარულად ამ ქვეყანაში რაიმეს ფასი ჰქონდეს“,- განაცხადა ეკა ბესელიამ.
ერთი წლის წინ სოციალურ ქსელში ეკა ბესელიას პირადი ცხოვრების ამსახველი კადრები გავრცელდა. ბესელია აღნიშნავდა, რომ კადრების გავრცელება დროში დაემთხვა მოსამართლეების შესახებ მის განცხადებებს.
გამოძიების ვერსიით, ვიდეოჩანაწერი 2019 წლის იანვრის თვეში, მკვლელობისთვის მსჯავრდებულმა საქართველოს მოქალაქემ ინტერნეტით გაავრცელა სომხეთის რესპუბლიკიდან. შსს-ს განცხადებით, აღნიშნული კადრები ბრალდებულმა ფეისბუქის მესენჯერის საშუალებით, რუსეთის ფედერაციის მოქალაქისგან მიიღო.
