ორი დღეა კომაშია 23 წლის სალომე გვასალია, ოჯახის ცნობით, ის 4 ოქტომბერს ხიდან ჩამოვარდა და ქუთაისის ინტერვენციულ საავადმყოფოში შეიყვანეს. ოჯახის ახლობლების თქმით, გოგონა კონტაქტურ იყო შემოყვანის მომენტში და მას მხოლოდ მოტეხილობა ჰქონდა.
თუმცა, ოპერაციის დროს გოგონას გული გაუჩერდა, რის გამოც პაციენტის ოჯახი ექიმის დასჯას მოითხოვს. ისინი ექიმს დაუდევრობაში ადანაშაულებენ და აცხადებენ, რომ ოპერაცია არასწორად ჩატარდა.
ოჯახის ახლობელი ამბობს, რომ ექიმების განცხადებით, ოპერაცია არ იყო საჩქარო და მას ყველა სათანადო გამოკვლევას ჩაუტარებდნენ. ხერხემლის ოპერაცია 6 ოქტომბერს ჩატარდა, რა დროსაც პაციენტის მდგომარეობა დამძიმდა. როგორც ექიმებმა ოჯახის წევრებს უთხრეს, პაციენტს გული გაუჩერდა. ამ დროისთვის პაციენტი კომატოზურ მდგომარეობაშია, ტვინზე შეშუპება აქვს და მეორე ოპერაციაც გაუკეთდა.
„შემოიყვანეს 4 ოქტომბერს, პაციენტს ჩაუტარდა შესაბამისი კვლევები, სიმძიმე შეფასდა საშუალოდ. აღენიშნებოდა ხერხემლის დახურული ტრავმა. შემდგომ, გადაწყდა ოპერაციული ჩარევა. გადაყვანილი იქნა საოპერაციოდ, წინასწარ ჩაუტარდა შესაბამისი კვლევები.
პაციენტი იყო კონტაქტური, ადეკვატური. ოპერაციის დამთავრებისთანავე აღინიშნა გულის გაჩერება. ჩატარდა შესაბამისი რეანიმაციული ღონისძიებები. გულის მუშაობა აღდგა, მას შემდეგ მდგომარეობა რჩება მძიმედ, სახეზეა ჰიპოქსიურ-ანოქსიური დაზიანება.
რამ გამოიწვია გულის გაჩერება შესაბამისი სამსახური ადგენს და ექსპერტიზის დასკვნით გახდება ცნობილი და ყველა აიღებს პასუხისმგებლობას თუ გამოიკვეთა,”- განაცხადა ექიმმა მამუკა ნემსიწვერიძემ.
გვასალიების ოჯახი საქმის გამოძიებას ითხოვენ.
ავტორი: თეკლა მორგოშია
