„საცხოვრებლების დაკანონების პროცესი წარმატებით მიმდინარეობს. ამ პროექტის ფარგლებში, 900-მდე ოჯახს უკვე დავუკანონეთ“ – ამის შესახებ დედაქალაქის მთავრობის სხდომაზე, მერმა კახა კალაძემ განაცხადა.
„მე და ჩემმა გუნდმა პირობა დავდეთ, რომ ის ოჯახები, რომლებიც 10, 12, 15 წლის განმავლობაში ცხოვრობდნენ საცხოვრებელ ბინებში და ვერ ახერხებდნენ საკუთარი ფართების დაკანონებას, გარკვეული ბიუროკრატიული პრობლემების გამო, სხვადასხვა ხარვეზის გამო, ჩვენ მათ დავპირდით, რომ ყველა ოჯახს დავეხმარებოდით და ხელს შევუწყობდით ამ ფართების დაკანონებაში.
87 ოჯახს გადაეცემა და დაუკანონდება საცხოვრებელი ფართები, აქედან 83 გახლავთ გუდამაყრის ქუჩაზე, ნაძალადევის რაიონში, 1 ოჯახი ქიზიყის ქუჩა, 3 ოქროყანა, მთაწმინდის რაიონი.
ჩვენ, რა თქმა უნდა, ვაგრძელებთ ამ პროგრამის განხორციელებას და კიდევ ერთხელ მინდა მივმართო იმ ოჯახებს, ვისაც ანალოგიური პრობლემები აწუხებთ, აუცილებლად მიმართეთ იმ რაიონის გამგეობას, სადაც უშუალოდ თქვენ ცხოვრობთ და გამგეობაში ზედმიწევნით აგიხსნიან ყველაფერს, თუ რა დოკუმენტები არის საჭირო იმისთვის, რომ პროცესი გაგრძელდეს და მოხდეს ბინების დაკანონება.
ამ პროექტის ფარგლებში, 900-მდე ოჯახს უკვე დავუკანონეთ საცხოვრებელი ფართები. ეს პროგრამა წარმატებულია და მის განხორციელებას ვაგრძელებთ“, – განაცხადა თბილისის მერმა.
