გიორგი შაქარაშვილის საქმეზე ერთ-ერთი ბრალდებული არასრულწლოვნის ადვოკატის, გიორგი გელხაურის თქმით, ფოტოგრაფმა იაკობ ბრეგვაძემ, რომელმაც 112-ში დარეკა, დანაშაული დაფარა.
მისი თქმით, საპატრულო პოლიციის თანამშრომლებმა არაეფექტურობა გამოავლინეს, რადგან ვერ მივიდნენ დროულად დანაშაულის ადგილზე.
ინფორმაციით, დღეს ციხეში გურამ ამირხანაშვილს მიიყვანენ, რომელმაც ბრალდებული უნდა ამოიცნოს.
„როდესაც მივიდა საპატრულო პოლიციის ეკიპაჟი მივიდა ბრეგვაძესთან, ჩაისვეს მანქანაში, ეს კიდე მეორე უკიდურესობაა რა უთხრა ბრეგვაძემ. ბრეგვაძეს კითხეს ვინ იყვნენ ის ხალხი, ვინც ჩხუბობდა, იცნობ თუ არა შენ მათ.
ბრეგაძე ეუბნება, „მე მოვდივარ დასავლეთიდან, მოვყვები მანქანებს ავტოსტოპით და ჩემთვის უცნობია ყველა ის პირი, რომელიც მონაწილეობდა ამ კონფლიქტში. ანუ რეალურად ბრეგვაძემ დამალა, დაფარა დანაშაული, რომელიც იქ მოხდა“, – აცხადებს გიორგი გელხაური.
დღეს შინაგან საქმეთა სამინისტროში გამართულ ბრიფინგზე გიორგი შაქარაშვილის გარდაცვალების საქმის გამოძიების ფარგლებში საგამოძიებო მოქმედებების დეტალების ნაწილი გასაჯაროვდა.
ბრიფინგზე გამოაქვეყნეს აუდიო ჩანაწერიც, რომელიც საქმის ფიგურანტის 112-ში ზარს უკავშირდება.
შეგახსენებთ, რომ ახალგაზრდა ფეხბურთელი 4-დღიანი სამძებრო სამუშაოების შემდეგ მდინარე არაგვში გარდაცვლილი იპოვეს.
მისი გარდაცვალების საქმეზე სამართალდამცველებმა 17 ადამიანი დააკავეს. ყველა მათგანს სასამართლომ აღკვეთი ღონისძიების სახით პატიმრობა შეუფარდა.
