აშშ-ის სახელმწიფო დეპარტამენტის პრესსპიკერი ნედ პრაისი, რუსეთ-საქართველოს აგვისტოს ომის 13 წლისთავთან დაკავშირებით ვიდეო მიმართვას ავრცელებს. ნედ პრაისი მოუწოდებს რუსეთის მთავრობას, რომ შეასრულოს 2008 წლის აგვისტოს ცეცხლის შეწყვეტის შეთანხმება.
„13 წლის წინ ამ დღეს რუსეთის ძალები შეიჭრნენ საქართველოში, დახოცეს ასობით მშვიდობიანი მოქალაქე და ათასობით ადამიანი აიძულეს, საკუთარი სახლები დაეტოვებინათ. ახლაც კი, რუსეთის ძალებს ოკუპირებული აქვთ საქართველოს ტერიტორიის დაახლოებით 20%. რუსეთის ოკუპაციას ტრაგიკული ადამიანური საფასური მოჰყვა, განსაკუთრებით „კოვიდ-19“-ის პანდემიის დროს.
მოვუწოდებთ რუსეთის მთავრობას, შეასრულოს 2008 წლის აგვისტოს ცეცხლის შეწყვეტის შეთანხმება. სოლიდარული ვართ საქართველოს მოსახლეობის მიმართ და მოუთმენლად ველოდებით დღეს, როდესაც ისინი კვლავ გაერთიანდებიან.“ – აცხადებს ნედ პრაისი.
