დონალდ ტრამპის ადმინისტრაციამ ნიუ-იორკი, პორტლენდი და სიეტლი ანარქისტულ ქალაქებად დაასახელა. ამის გამო, შესაძლოა, ქალაქებმა ფედერალური ხელისუფლების დაფინანსება დაკარგონ. ამის შესახებ BBC-ი წერს.
ტრამპის ადმინისტრაციამ აღნიშნული ქალაქები დანაშაულის შემწყნარებლობაში დაადანაშაულა.
ოფიციალური პირების განცხადებით, ქალაქებმა აშშ-ში ზაფხულში მიმდინარე საპროტესტო აქციებზე დანაშაულის შეჩერება ვერ მოახერხეს.
„ჩვენ ვერ დავუშვებთ, რომ ფედერალური ბიუჯეტიდან თანხა გაიფლანგოს, მაშინ როდესაც მოქალაქეების უსაფრთხოება დაცული არ არის“, – ნათქვამია აშშ-ის გენერალური პროკურორის, უილიამ ბარის, მიერ გავრცელებულ განცხადებაში.
შეგახსენებთ, რომ ნიუ-იორკში, პორტლენდსა და სიეტლში მაისის შემდეგ პოლიციის მხრიდან ძალის გადამეტებისა და რასიზმის საწინააღმდეგო საპროტესტო აქციები არ წყდება. პროტესტი ჯორჯ ფლოიდის გარდაცვალებას მოჰყვა, რომელიც დაკავების დროს, პოლიციელების მიერ გამოჩენილი ძალადობის შედეგად შეუძლოდ გახდა და საავადმყოფოში გარდაიცვალა.
