ქობულეთის მეორე საბავშვო ბაღში პედაგოგის კორონავირუსით ინფიცირების გამო, სააღმზრდელო პროცესი არ განახლდა.
ქობულეთის ბაღების გაერთიანების დირექტორ ია ხალვაშის ინფორმაციით აღნიშნულ ბაღში შაბათს ჩატარებული გეგმიური ტესტირების დროს ერთ აღმზრდელ-პედაგოგს კორონავირუსი დაუდასტურდა.
„დღეს სააღმზრდელო პროცესი არ განახლდა ქობულეთის მეორე ბაღში. მის შესახებ მშობლებს შეტყობინებები გაეგზავნათ და ინფორმირებული არიან.
ყველა თანამშრომელი გადავიდა თვითიზოლაციაში. თანამშრომლებს ქონდათ ერთმანეთთან გარკვეული კონტაქტი წინა მოსამზადებელ პერიოდში. მიუხედავად იმისა, რომ ორ ცვლაში მოდიოდნენ და ნაწილს კონტაქტი არ ქონია ინფიცირებულთან, მაინც ვერ გავრისკავდით და ყველა თვითიზოლაციაშია.
12 დღის შემდეგ გაიტესტება ყველა თანამშრომელი. პასუხების შედეგად ეპიდემიოლოგები როგორც კი მოგვცემენ უფლებას, გაიხსნება ბაღი. ტექნიკურად ჩვენ მზად ვართ.
ქობულეთის მუნიციპალიტეტში არსებულ დანარჩენ 28 ბაღში ჩვეულ რეჟიმში მიმდინარეობს სააღმზრდელო პროცესი საპრევენციო ზომების სრული დაცვით. სააღმზრდელო პროცესის დაწყებამდე განხორციელდა თანამშრომელთა ტესტირება, სადენზინფექციო და მორეცხვითი სამუშაოები.
გამოცხადება 50%-ია, ვთვლი რომ არ არის ცუდი, დღეს ცუდი ამინდიც იყო”- აცხადებენ ქობულეთის ბაღების გაერთიანებაში.
ავტორი:ნაირა ქობულაძე
