1 მარტისთვის ყვარლის მუნიციპალიტეტის ბაგა-ბაღების პერსონალი კორონავირუსზე გატესტილი არ არის. სკოლამდელი აღზრდის დაწესებულებებში სააღმზრდელო პროცესი ისე დაიწყო, რომ თანამშრომლების ტესტირება ჯერ არ დაწყებულა.

ინფორმაციას ამის შესახებ, ყვარლის მუნიციპალიტეტის ბაგა-ბაღების გაერთიანების დირექტორი, ზაზა ზაუტაშვილი ადასტურებს.

„ჯერ ტესტირება არ ჩაგვიტარებია. დღეს უნდა შევხვდეთ საზოგადოებრივი ჯანდაცვის წარმომადგენლებს და გადავწყვიტოთ, როგორ გაიარონ თანამშრომლებმა ტესტირება“,- განაცხადა ზაუტაშვილმა.

ის ფაქტი, რომ ბაგა-ბაღების თანამაშრომლების კორონავირუსზე ტესტირება რომ არ ჩატარებულა, ყვარლის საზოგადოებრივი ჯანდაცვის ცენტრის დირექტორმა, მერაბ სეფაშვილმაც დაადასტურა.

„დღეს შევიკრიბებით და გრაფიკს შევადგენთ, სკოლების და ბაღების ერთად გასატესტად, ორჯერ ჩასვლა რომ არ მოგვიწიოს. თვითონ უნდა გამოეჩინათ ინიციატივა, ვინც მოდის, იმას ვტესტავთ“,- განაცხადა სეფაშვილმა.

ყვარლის მუნიციპალიტეტში 22 საბავშვო ბაღია, სადაც 1200- ზე მეტი აღსაზრდელი სწავლობს.

საკოორდინაციო საბჭოს გადაწყვეტილებით, 1 მარტიდან საბავშვო ბაღებში, სააღმზრდელო პროცესი დაიწყო. კორონავირუსისათვის დაწესებული რეგულაციების თანახმად, ბაგა-ბაღების პერსონალი ორ კვირაში ერთხელ სავალდებულო ტესტირებას ექვემდებარება.

ავტორი: ხათუნა გულიაშვილი