ოკუპირებული აფხაზეთიდან გადმოსული სამი პირი, მათ შორის ორი ქალი და ერთი ახალგაზრდა მამაკაცი, რუსმა ოკუპანტებმა ზუგდიდის მუნიციპალიტეტის სოფელ ხურჩასთან გუშინ, 18 იანვარს კომენდანტის საათის დროს დააკავეს და უკან, ოკუპირებულ ტერიტორიაზე გადაიყვანეს. მომხდარ ფაქტს იქვე ხურჩის ცენტრთან მცხოვრები ადგილობრივები ხედავდნენ.

სოფლის მოსახლეობა ამბობს, რომ დაკავება საოკუპაციო ხაზიდან დაახლოებით 500 მეტრში მოხდა.

„გვიშველეთო ყვიროდნენ, სადმე დარეკეთო. თავიდან არ მეგონა, რუსები თუ იყვენენ და 112-ში ვრეკავდი. მერე დავინახე, რომ ბიჭი გამორბოდა და ყველა ერთად მისდევდა. სამნი იყვნენ, არ ვიცით სად მიდიოდნენ. ვიცი, რომ გამოქცეულები იყვნენ და შველას ითხოვდნენ. ახალგაზრდა ბიჭს ეტყობოდა, რომ ნაცემი იყო,” – ამბობს ხურჩის მცხოვრები ელისო შამუგია.

სოფელ ხურჩაში ევროკავშირის სადამკვირვებლო მისიის წარმომადგენლები შემთხვევის ადგილთან მივიდნენ.

მომხდარის შესახებ ინფორმაცია თავდაპირველად სუს-მა გაავრცელა.

მათივე ცნობით, დაკავებულები ამჟამად უკანონო პატიმრობაში უკვე აღარ იმყოფებიან.

ავტორი: თეა შონია