„ევროპული საქართველოდან“ „ნაციონალებში“ ჯერ არავინ გადმოსულა, მაგრამ რამდენიმე ათეული ჩემი მხარდამჭერი შესაძლებელია მალე იხილოთ ჩემ გვერდით, – ამის შესახებ ენმ-ს მაჟორიტარი დეპუტატობის კანდიდატი სამცხეში ვაჟა ჩიტაშვილი აცხადებს.

მან 3 აგვიტოს „ევროპული საქართველოს“ ახალციხის ოფისი დატოვა და „ერთიან ნაციონალურ მოძრაობას“ შეუერთდა. ის ამბობს, რომ კანდიდატად მისი დასახელების შემდეგ, „ევროპული საქართველო“ მისმა თანაგუნდელებმაც დატოვეს, ოღონდ არაოფიციალურად.

„არ დამითვლია, ვერ ვიტყვი რომ ყველა, მაგრამ აღარავინ დარჩება იქ, ალბათ ოცამდე კაცი. ოფიციალურად არ წამოსულან, უბრალოდ ჩემი მხარდამჭერები არიან, ჩემს გვერდზე იქნებიან. „ნაციონალურ მოძრაობაში“ ოფიციალურად არ არიან გაწევრიანებულები“, – გვითხრა ვაჟა ჩიტაშვილმა.

მას ვანო მერაბიშვილი უჭერს მხარს. შს ყოფილი მინისტრი ახალციხეში 16 აგვისტოს იმყოფებოდა, სადაც ოთხი მუნიციპალიტეტის – ბორჯომის, ახალციხის, ადიგენისა და ასპინძის „ევროპული საქართველოსა“ და „ერთიანი ნაციონალური მოძრაობის“ წარმომადგენლებს შეხვდა.

სწორედ მისი ვიზიტის შემდეგ გავრცელდა ინფორმაცია ახალციხეში, ორი პარტიის გაერთიანების შესახებ. ვაჟა ჩიტაშვილი არ გამორიცხავს, რომ ვანო მერაბიშვილის პოზიციამ იქონია გავლენა ახალციხის „ევროპული საქართველოს“ ოფისის წევრებზე, მაგრამ ამბობს, რომ „მსგავსი ტიპის საუბარი – დატოვე პარტია და ა.შ.“ არ ყოფილა.

რაც შეეხება ახალციხის „ევროპული საქართველოსა“ და „ერთიანი ნაციონალური მოძრაობის“ ოფისის წევრებს, ინფორმაციას არც ადასტურებენ და არც უარყოფენ. ადგილობრივ ოპოზიციაში ამბობენ, რომ დეტალები რამდენიმე დღეში გახდება ცნობილი.

ავტორი: რუსკა გვარამაძე