პოლიტიკის ანალიტიკოსი გიორგი ახვლედიანი ფიქრობს, რომ ბოიკოტის რეჟიმში მყოფი ოპოზიცია პოლიტიკურ ჩიხში შევიდა. როგორც ახვლედიანმა “პრაიმტაიმნიუსთან” საუბრისას აღნიშნა, პარტიები, რომლებიც პარლამენტში შესვლაზე უარს ამბობენ, ელექტორატს დაკარგავენ და ფინანსურად გაკოტრდებიან.
„ეს კინო ჩვენ 2008 წელს უკვე ვნახეთ, ამ კინოს არ აქვს ბედნიერი დასასრული ბოიკოტის რეჟიმში მყოფი იმ პარტიებისთვის, რომლებიც პარლამენტში არ შედიან. ბოიკოტის რეჟიმში მყოფი პარტიები უარს ამბობენ ძალიან მნიშვნელოვან პოლიტიკურ ტრიბუნაზე, რომელიც მათ ჟანგბადივით სჭირდებათ.
ოპოზიციურ პარტიებს ექმნებათ სერიოზული საფრთხე, რომ ელექტორალურად განულდნენ და ფინანსურად გაკოტრდნენ, ეს ყველაფერი ამერიკის სახელმწიფო დეპარტამენტმა, ბუნებრივია, ძალიან კარგად იცის.
ოპოზიციამ საკუთარი თავი ჩიხში შეიყვანა. მათ საზოგადოებას გამოუცხადეს, რომ არავითარ შემთხვევაში არ შევლიან პარლამენტში. ეს პარტიები ახლა ცდილობენ, რომ დაარღვიონ ის მოჩვენებითი ერთობა, რომელიც მათ „ნაცმოძრაობასთან“ ერთად აქვთ, რადგან პარტიებს ესმით, რომ პარლამენტში შესვლა აუცილებელია“,- განაცხადა ახვლედიანმა.
ინფორმაციისთვის, ამერიკის შეერთებული შტატების სახელმწიფო დეპარტამენტმა განცხადება გაავრცელა, რომელშიც დეპარტამენტი ოპოზიციურ ოპოზიციონერ პოლიტიკოსებს მოუწოდებს, პარლამენტში შევიდნენ და სადეპუტატო უფლებამოსილება განახორციელონ.
