ამ წუთებში სენაკის რაიონულ სასამართლოში გაუპატიურებაში ბრალდებული მამა-შვილის სასამართლო პროცესი მიმდინარეობს.
მოსამართლე შალვა ნუცუბიძემ უნდა მიიღოს გადაწყვეტილება, თუ რა სახის აღკვეთ ღონისძიებას შეუფარდებს დაკავებულებს. პროკურატურის შუამდგომლობა პატიმრობაა.
სამეგრელოს პოლიციამ 3 დღის წინ დააკავა მამა-შვილი, 65 და 35 წლის მამაკაცები, რომელთა წინააღმდეგაც გამოძიება გაუპატიურების მუხილთ დაიწყო. ისინი მოზარდის მეზობლები არიან. მათ ბრალდება საქართველოს სისხლის სამართლის კოდექსის 137-ე მუხლის მე-4 ნაწილის “გ” ქვეპუნქტით წარედგინათ ( გაუპატიურება, ჩადენილი წინასწარი შეცნობით არასრულწლოვანის მიმართ ბ.გ.-ს ორი ეპიზოდი, ზ.გ.-ს სამი ეპიზოდი), ხოლო ზ.გ-ს ასევე ბრალდება 138-ე მუხლის მე-3 ნაწილის “გ” ქვეპუნქტით (სექსუალური ხასიათის სხვაგვარი ქმედება ჩადენილი ძალადობით, დაზარალებულის უმწეობის გამოყენებით, წინასწარი შეცნობით თოთხმეტი წლის ასაკს მიუღწეველთან).
გუშინ, 25 ივნისს ცეცხლი წაუკიდეს იმ სახლს, სადაც დაკავებულები ცხოვრობდნენ.
მიუხედავად იმისა, რომ საცხოვრებელ სახლს პოლიცია 2 დღის განმავლობაში იცავდა, მოზარდის ახლობლებმა და სოფლის მცხოვრებლებმა ცეცხლის გაჩენა სახლში მაინც შეძლეს.
დაწყებულია გამოძიება ასევე სახლისთვის ცეცხლის გაჩენის ფაქტზეც.
ავტორი: თეა შონია
