სამეგრელოში, არასრლუწლოვნების გაუპატიურების საქმის პროკურორის, ბესიკ ქვარცხავას განცხადებით, ბრალდებულები კანონის სრული სიმკაცრით აგებენ პასუხს ჩადენილ დანაშაულზე.
„დღევანდელ სხდომაზე სასამართლომ სრულად გაიზიარა ბრალდების მხარის მიერ წარმოდგენილი მტკიცებულებები და დასაბუთებული შუამდგომლობა. შესაბამისად, სქესობრივ დანაშაულში ბრალდებული პირების მიმართ აღკვეთის ღონისძიების სახით გამოიყენა პატიმრობა.
საქართველოს პროკურატურა ახორციელებს მკაცრ სისხლის სამართლებრივ პოლიტიკას მსგავსი კატეგორიის დანაშაულებზე. შესაბამისად, მოცემულ საქმეში ბრალდებულებიც კანონის სრული სიმკაცრით აგებენ პასუხს. გარდა ამისა, მოცემულ საქმეზე არასრულწლოვანი ბავშვების კანონიერი ინტერესების დასაცავად, პროკურატურა ახორციელებს სხვადასხვა სახის ღონისძიებებს, პროცესში ჩართული სხვადასხვა შესაბამისი უწყებების ერთობლივი ჩართულობით და შეთანხმებით.
არასრულწლოვანთა მართლმსაჯულების კოდექსიდან გამომდინარე, ჩვენ ვერ ჩავშლით კონკრეტული მტკიცებულებების შინაარსს, თუმცა შეგვიძლია აღვნიშნოთ, რომ მოცემულ სისხლის სამართლის საქმეზე, ამ ეტაპზე მოპოვებულია კონკრეტული მტკიცებულებები, რომლებიც პირდაპირ ადასტურებენ ბრალდებულების მიმართ წარდგენილ ბრალდებას. ამასთან, აღვნიშნავთ რომ საქმეზე გრძელდება ჯერ კიდევ გამოძიება და მას შემდეგ, რაც დასრულდება გამოძიების პროცესი, მოცემულ სისხლის სამართლის საქმე წარიმართება სასამართლოში არსებითად განხილვის მიზნით და შესაბამისად, ბრალდების მხარეს აქვს გონივრული მოლოდინი, რომ სწორედ სასამართლო პროცესზე წარმოდგენილი და გამოკვლეული მტკიცებულებების საფუძველზე, სასამართლოს მხრიდან მიღებული იქნება ერთადერთი და სამართლიანი, კანონიერი და დასაბუთებული გადაწყვეტილება გამამტყუნებელი განაჩენის სახით“,- განუცხადა ჟურნალისტებს პროკურორმა სასამართლო სხდომის დასრულების შემდეგ.
სენაკის სასამართლომ აღმკვეთის ღონისძიების სახედ პატიმრობა შეუფარდა 8 წლის გოგონას გაუპატიურების საქმეში ბრალდებულ მამა-შვილს.
სხდომას, რომელიც მედიისთვის დაიხურა, რადგან საქმე არასრულწოვნებზე სექსუალურ ძალადობას ეხება, ორივე ბრალდებული ესწრებოდა.
გაუპატიურების ბრალდებით დაკავებულმა მამა-შვილმა სასამართლო პროცესზე დუმილის უფლება გამოიყენეს.
ადვოკატ დავით გოგუას თქმით, ორივე მათგანი ამ ეტაპზე დუმილის უფლებას იყენებს.
ადვოკატის განმარტებით, ისინი აღმკვეთი ღონისძიების არცერთი სახის გამოყენებას არ ითხოვდნენ.
მისივე თქმით,ბრალს არც 36 წლის მამაკაცი აღიარებს. აპირებენ თუ არა სასამართლოს გადაწყვეტილების გასაჩივრებას, მისი ადვოკატი ზაზა კვირკველია ამბობს, რომ როცა გადაწყვეტილება ჩაბარდება, პოზიციას დაკავებულთან შეაჯერებს.
ავტორი: თეა შონია
