27 სექტემბერი სოხუმის დაცემის დღეა. მაშინ, როცა აფხაზეთი სეპარატისტებმა სრულად დაიკავეს 1993 წელი იყო. მას შემდეგ, წელს, სოხუმი 27-ედ დაეცა და მასთან ერთად საქართველო…
ომმა, რომელიც 13 თვესა და 13 დღეს გაგრძელდა, 250 000-ზე მეტი ეთნიკური ქართველი, ბერძენი თუ სხვა უმცირესობები აფხაზეთიდან ლტოლვილ-დევნილად აქცია.
საკუთარ სამშობლოში, ერთი კუთხიდან მეორეში ტანსაცმლის ამარა გამოქცეულები 27 წელია ელოდებიან დაბრუნებას… დაბრუნებას საკუთარ სახლებში. საუკუნის მეოთხედზე მეტია, რაც აფხაზეთიდან იძულებით გადაადგილებულები „დროებით” სხვადასხვა მისამართებზე ცხოვრობენ, მაგრამ ჩრდილოელი ოკუპანტი მეზობლის „წყალობით”, დროებითობას დასასრული არ აქვს…
ყველა მათგანი ერთ სიტყვაში „დევნილში” ერთიანდება, მათ სახლებს დროებითი საცხოვრებლები ჰქვიათ…
უკვე 27 წელია, თითოეულისთვის აფხაზეთის დაცემა ზღვით გამოქცეულ ოთხფეხა მეგობართან, დაბნეული და გამოგდებული ქართველებით სავსე გემთან ასოცირდება. კიდევ – აფეთქებებით გამოწვეულ შავ კვამლში გახვეულ ოდესღაც ყველაზე მწვანე აფხაზეთთან და ჭუბერის უღელტეხილის საფეხმავლო ბილიკებზე მოსიარულე ადამიანებთან, რომლებიც უკან იყურებოდნენ, უკან – დაბრუნების იმედით…
აფხაზეთის ომი გვახსენებს უამრავ გმირს, რომლებიც სოხუმთან და ერთიან საქართველოს იდეასთან ერთად დაეცნენ… გვახსენებს გმირებს, რომლებიც გადარჩნენ… დიდხანს აფხაზეთის ომი ცნობილი იყო, როგორც ძმათა ომი. თუმცა, არ საუბრობდნენ რუსეთის მიერ განხორციელებულ ანექსიასა და ოკუპაციაზე…
აკაკი ბაქრაძე ამ ომამდე ჯერ კიდევ 1978 წელს ცნობილ წერილში „აფხაზთა საკითხი“ ღიად აღნიშნავდა, რომ „აფხაზთა ჭირვეულობის“ მამოძრავებელი ძალა მოსკოვიაო.
„აფხაზთა სახით მოსკოვს მომარჯვებული აქვს დანა, რომელსაც მაშინვე ჩასცემს საქართველოს ზურგში, როგორც კი ქართველები დააპირებენ ეროვნულ გამოფხიზლებას. მოსკოვის პროვოცირებული „აფხაზური ჭირვეულობა“ ერთდროულად არის მიმართული როგორც აფხაზი, ისე ქართველი ხალხის წინააღმდეგ. ამიტომ როგორც ქართველებს, ისე აფხაზებს ღრმა დაფიქრება მართებთ“, – წერდა აკაკი ბაქრაძე.
1993 წლიდან დღემდე, ენგურის ხიდია ის წყალგამყოფი, რომლის იქითა მხარეს, ყოველ 27 სექტემბერს აფხაზები სოხუმის გათავისუფლებას აღნიშნავენ. აქეთა მხარეს კი, დაცემულ სოხუმს გლოვობენ.
1993 წლიდან დღემდე აფხაზეთი ოკუპირებულია რუსეთის მიერ… ახლა, აფხაზეთი იმ 20 პროცენტის ნაწილია, რომელიც ანექსირებულია ჩრდილოელი რუსეთისაგან.
უკვე 27 წელია, რაც აფხაზეთი ოკუპირებული შიდა ქართლის მსგავსად, რუკის ფოტოებზე წითელი მავთულხლართებით მონიშნულია…
აფხაზეთში საბრძოლო მოქმედებები 1992 წლის ბოლოს დაიწყო და 1993 წლის 27 სექტემბერს რუსი ოკუპანტებისა და აფხაზი სეპარატისტების გამარჯვებით დასრულდა…
