ჩვენ არ დაგვიმალავს ჩვენი სტუმრისთვის, რომ ვგეგმავთ საპროტესტო აქციებს, როგორც რეგიონებში, ისე თბილისის მასშტაბით, ბუნებრივია, მას ეს ძალიან კარგად ესმის. ჩვენ ხაზი გავუსვით ჩვენს ძირითად მოთხოვნებს. ეს არის ხელახალი, ვადამდელი არჩევნები, პოლიტიკური დევნის შეწყვეტა, სამართლიანი არჩევნების გარემოს შეცვლა“, – ამის შესახებ „ერთიანი საქართველოს” ლიდერმა ნინო ბურჯანაძემ ჟურნალისტებთან ლიეტუვას სეიმის საგარეო კომიტეტის თავმჯდომარესთან, ჟიგიმანტას პავილიონისთან შეხვედრის შემდეგ განაცხადა.
„ბუნებრივია, ხაზი გავუსვით იმ გარემოებას, რომ არავითარ შემთხვევაში ჩვენ არ მივცემთ ხელისუფლებას იმის საშუალებას, რომ კიდევ ერთი პოლიტპატიმარი, ნიკა მელია მიუმატოს პოლიტპატიმრების სიას. რა თქმა უნდა, აქციებს არამარტო შევუერთდები, არამედ ყველა ერთად ვართ და ვგეგმავთ სამომავლო მოქმედებებს. დარწმუნებული ვარ, ძალიან ბევრი რიგითი მოქალაქე, რომელიც შეიძლება შორს იყოს რომელიმე პარტიული კუთვნილებიდან, აუცილებლად შემოგვიერთდება. აქ არ არის საუბარი რომელიმე პოლიტიკურ პარტიაზე, არც პოლიტიკურ ლიდერზე, აქ პრინციპზეა საუბარი, უსამართლობაზე თვალი არ უნდა დახუჭო“,-აცხადებს ნინო ბურჯანაძე.
