პოლიტიკური პლატფორმა „სტრატეგია აღმაშენებელის“ დამფუძნებელი გიორგი ვაშაძე „პრაიმტაიმნიუსთან“ საუბრისას აცხადებს, რომ გზაში მას უპოვარი ადამიანები ხატებს ჩუქნიან და ეუბნებიან, რომ „მისი იმედი აქვთ”. როგორც ვაშაძემ განაცხადა, მისთვის მნიშვნელობა არა აქვს, რა თქვა მასზე ექსპრეზიდენტმა მიხეილ სააკაშვილმა.
„მათხოვრებიც კი მჩუქნიან ხატებს, ყველა მეუბნება, შენი იმედი გვაქვსო და რა მნიშვნელობა აქვს, რა თქვა სააკაშვილმა. მთავარია, რა უნდა ხალხს. მე ყოველთვის ვფიქრობ სიღარიბის დამარცხებაზე. ჩემს მიმართ ხალხის დამოკიდებულება მაძლევს ენერგიას. ნამდვილად არ ვაპირებ ამ მითქმა-მოთქმაში მონაწილეობის მიღებას.
კარგი იქნება, თუ ყველა კონცენტრირდება ხალხის პრობლემებზე, სამუშაო ადგილების შექმნაზე და თუ ყვლა კონკრეტულ გეგმას წარუდგენს ხალხს, ისევე როგორც წარვადგინეთ ჩვენ “სტრატეგია აღმაშენებელმა”. მე ვაპირებ, რომ გავხდე ამ ქვეყნის პრემიერ-მინისტრი. მაქვს ერთი მიზანი, ადამიანებს მათხოვრობა არ უწევდეთ და ყოველდღიურად შიმშილს არ ებრძოდნენ“,- განაცხადა ვაშაძემ.
შეგახსენებთ, საქართველოს ყოფილმა პრეზიდენტმა მიხეილ სააკაშვილმა „მთავარი არხის” ეთერში განაცხადა, რომ „სტრატეგია აღმაშენებლის“ დამფუძნებელი გიორგი „ვაშაძე ბნელ მხარეს გადავიდა“. სააკაშვილმა აღნიშნული განცხადება მას შემდეგ გააკეთა, რაც ვაშაძემ და თაკო ჩარკვიანმა გაერთიანებული ოპოზიცია დატოვეს და საკუთარი პოლიტიკური პლატფორმა „სტრატეგია აღმაშენებელი“ ჩამოაყალიბეს.
ავტორი: ეკატერინე ზარნაძე
