აჭარის მთავრობის სახლთან, ე.წ „თავისუფლების კვარტალში“ აჭარაში მოქმედმა ყველა ოპოზიციურმა პარტიამ ერთობლივი განცხადება გააკეთა და მიმართა საქართველოში მოქმედ ყველა საელჩოსა და საერთაშორისო პარტნიორებს.
როგორც „ერთიანი ნაციონალური“ მოძრაობის” ერთ-ერთი ლიდერი მირდატ ქამადაძემ აცხადებს, პარალელურად მოლაპარაკებებისა, ქუჩაში საპროტესტო აქცია მიმდინარეობს და მნიშვნელოვანია გააგებინონ აჭარაში არსებული ვითარების შესახებ საერთაშორისო პარტნიორებს, რომ თუ მთლიანად საქართველოში 32 პროცენტში არ გამოდიოდა ბალანსი ოქმებში, აჭარაში ეს 54 პროცენტს აღწევს, ხოლო ბათუმში 80 პროცენტს.
მისივე განცხადებით, ასევე მთავარი თხოვნა და გზავნილია, რომ მათ არ დაიშურონ ძალისხმევა, რათა ქვეყანაში საქართველოს მოქალაქეების აბსოლუტური უმრავლესობის ნება აღსრულდეს და იგი გამოიხატოს ხელახალ არჩევნებში.
„მოგესალმებით ბათუმიდან, ადგილიდან, სადაც 35-ე დღეა, რაც უწყვეტ რეჟიმში მიმდინარეობს საერთო-სახალხო პროტესტის გამომხატველი მშვიდობიანი აქცია, ადგილიდან, სადაც ადამიანები 24 საათის განმავლობაში ვდგავართ უამინდობასა და სიცივეში, ადგილიდან, რომელსაც ხალხმა თავად დაარქვა “თავისუფლების კვარტალი”. ეს სიტყვა მნიშვნელოვანია თითოეული ჩვენთაგანისათვის, ვაცნობიერებთ იმას, რომ თავისუფლებისათვის ბრძოლის შედეგია თანამედროვე ევროპული (დასავლური) ფასეულობები და ზოგადად კონსტიტუციური სამართალი! სამარცხვინოა, რომ იმ ქვეყანაში, რომელმაც 2008 წლის პლებისციტით მოსახლეობის 77%-მა ნატოში შესვლას დაუჭირა მხარი, ქვეყანაში, რომელშიც ევროინტეგრაციის ისტორიული პროცესი საზოგადოების სრული თანხმობითაა დეკლარირებული, დღეს 21-ე საუკუნის მეორე ოცწლეულის მიჯნაზე ხალხს გვიწევს საუბარი იმაზე,რომ არჩევნები საქართველოში ტოტალურად გაყალბდა! პარლამენტის არჩევნების პარალელურად ჩატარდა აჭარის ა.რ. უმაღლესი საბჭოს არჩევნები და გაცნობებთ, რომ თუ საქართველოს მასშტაბით საარჩევნო უბნების 32 % -ში ვერ შედგა ბალანსი, აჭარაში ეს რიცხვი 54 %-ს, ხოლო ბათუმში – 80 %-ს უტოლდება! გაყალბების ასეთმა მასშტაბებმა გადაგვაწყვეტინა აჭარაში მოქმედ ყველა ოპოზიციურ პარტიას, დაგვეწყო პროტესტი ხელახალი არჩევნების მოთხოვნით! ამ მოთხოვნის რეალურ წყაროს ხალხი წარმოადგენს, რომელთა შეკვეთაცაა გაყალბების შედეგად მიღებულ პარლამენტსა და აჭარის უმაღლეს საბჭოში არშესვლა!
ჩვენ გვესმის საქართველოს პარტნიორი ქვეყნებისა და ავტორიტეტული საერთაშორისო ორგანიზაციების სურვილი და მცდელობა, პოლიტიკური პროცესი მიმდინარეობდეს პარლამენტის კედლებში, რადგან ასე ხდება ნორმალურ დემოკრატიულ ქვეყნებში. ვაფასებთ თქვენს კეთილგონიერ და მეგობრულ განზრახვას, პათოსში გეთანხმებით, თუმცა დავსძენთ, რომ ხელისუფლებამ არჩევნების გაყალბება არ იკმარა და ძალაუფლება სრულად მიიტაცა. ცენტრალური საარჩევნო კომისია არ დაელოდა სასამართლო გადაწყვეტილებებს, ისე გამოაცხადა შემაჯამებელი შედეგები და ამით ნაცვლად განმუხტვისა, კიდევ უფრო მძიმე პოლიტიკური კრიზისის შექმნას შეუწყო ხელი.ასევე, საგულისხმოა, რომ ამ პროცესში სასამართლო წარმოდგენილია მხარედ, რაც ხელისუფლების დანაწილებისა და მის შტოთა დამოუკიდებლობის პრინციპს ეწინააღმდეგება! საპროტესტო აქციების მსვლელობისას პოლიცია უხეშად არღვევს “გამოხატვის თავისუფლების” პრინციპს, აკავებს სამოქალაქო აქტივისტებს და სასამართლო კონვეირული წესით აფორმებს მსგავს უკანონობებს.
შექმნილი სიტუაციიდან გამომდინარე, გვსურს გითხრათ, რომ ჩვენ ერთგული ვრჩებით იმ ღირებულებების, რომლისკენაც მოისწრაფვოდა საქართველო ისტორიულად. განა თავისუფლებისათვის მუდმივი ბრძოლა არ არის დასავლური ცივილიზაციის საფუძველი? ამიტომ, თავს მოვალედ მივიჩნევთ, მოგმართოთ, მადლობა გითხრათ იმ ძალისხმევისათვის, რომელსაც იჩენთ მუდმივად და გთხოვთ,რომ კიდევ ერთხელ მოუწოდოთ ხელისუფლებას დაუბრუნდეს კონსტიტუციურ სივრცეს ახალი არჩევნების დანიშნვით და ჩატარების შეცვლილი ფორმატით. ხალხის უმრავლესობის პოზიცია პრინციპული და უცვლელია!
ჩვენ, აჭარაში მოქმედი პოლიტიკური პარტიების საკოორდინაციო საბჭოს თითოეული წევრი, ვიცავთ და გამოვხატავთ მათ კანონიერ მოთხოვნას და მზად ვართ ბოლომდე ვიბრძოლოთ სამართლიანი არჩევნების და დემოკრატიული მმართველობის მისაღწევად!“, ნათქვამია განცხადებაში.
შეგახსენებთ, ხელახალი არჩევნების მოთხოვნით აჭარის მთავრობასთან გაერთიანებული ოპოზიცია აქციებს მართავს.
ავტორი: ნაირა ქობულაძე
