აჭარის ჭიდაობის ფედერაციის პრეზიდენტად მოქმედი პრეზიდენტი ანზორ ლაზიშვილი აირჩიეს.
არჩევნები, რომელიც აჭარის განათლების სამინისტროს შენობაში დღეს ჩატარდა, ხმაურის ფონზე მიმდინარეობდა.
არჩევნებში მოქმედი პრეზიდენტი ანზორ ლაზიშვილი და ხულოს სპორტსკოლის დირექტორი მევლუდ წულუკიძე მონაწილეობდნენ.
არჩევნებში მონაწილეობის მისაღებად კანდიდატებს განცხადების შეტანა 10 თებერვლამდე შეეძლოთ, პრეზიდენტი 34 დელეგატმა უნდა შეარჩიოს. არჩევნები ფარული კენჭისყრით უნდა ჩატარდეს.
არჩევნები ორ საათზე იყო დანიშნული, თუმცა ერთი საათით გვიან დაიწყო, რადგან ორივე კანდიდატის მხარდამჭერებს შორის სიტყვიერი დაპირისპირება იყო.
ერთ-ერთმა დელეგატმა მევლუდ წულუკიძემ პროტესტის ნიშნად თავისი კანდიდატურა მოხსნა და დარბაზი დატოვა. როგორც ის აცხადებს, დელეგატთა შემადგენლობას არალეგიტიმურად თვლის. მევლუდ წულუკიძის მხარდამჭერები აჭარის განათლების სამინისტროს შენობასთან არიან შეკრებილები და არჩევნების შედეგებს ელოდებიან. მევლუდ წულუკიძის გამოსვლის შემდეგ ისინი შენობაში შესვლას ითხოვენ. მათ ამისი საშუალება პოლიციამ არ მისცა.
„აქ ვართ მოჭიდავეები, ვიზეც დგას სპორტი აჭარაში. ჩვენ გვაქვს მითხოვნა, შეიცვალის პრეზიდენტი ანზორ ლაზიშვილი და ისეთი მოვიდეს, ვინც ჩვენს პრობლემებზე იზრუნებს.
არც ერთი სპორტსმენი არ მონაწილეობს არჩევნებში. თავისი სია აქვთ. ჩვენ არ ვთვლით ანზორ ლაზიშვილს ჩვენს პრეზიდენტად. ერთი სპორტსმენი არ დგას მის გვერდით. ჩვენ უნდა მოგვცენ არჩევნებში მონაწილეობის უფლება და დელეგატები სწორად შეარჩიონ”- აცხადებს ევროპის ჩემპიონი ბერძნულ-რომაულ ჭიდაობაში მინდია წულუკიძე.
როგორც ანზორ ლაზიშვილმა განაცხადა, ის აუცილებლად შეხვდება სპორტსმენებს, ოღონდ დღეს არა, რათა არ მოხდეს დაპირისპირება მის ხარდამჭერებსა და მევლუდ წულუკიძის მხარდამჭერებს შორის.
„მინდა გავიდე, დაველაპარაკო, ბევრი ჩემი მომხრეა გარეთ და არ მინდა ერთმანეთში დაპირისპირება მოხდეს. დავურეკავ და ცალკე შევხვდები ყველას. შეიძლება ვიღაცას უნდა პროვოკაცია მოხდეს, მერე უკვე უმართავი იქნება პროცესები. მე მევდუდ წულუკიძეს ველაპარაკე.
ერთი პრეტენზია თქვან, რა ვერ გავაკეთე.
386 ათასი ლარი მაქვს დაფინანსება, 72 ათასი ლარი მოზიდული მაქვს სახელმწიფო სტრუქტურებიდან, 15 ათასი ლარი – კერძო. მოვახმარე მაგათ.
მუხრან ვახტანგაძე მსოფლიო ჩემპიონი გახდა და 5 ათასი ლარზე მეტი არ მივეცით, ბინა არ მივეცით. და გობაძეს მივეცით აჭარის ჭიდაობის ფედერაციამ 20 ათასი ლარი, ბინაც თორნიკე რიჟვაძის დამსახურებით. დღე და ღამე ვზრუნავდით მათზე. დელეგატების სია თვითონ ამოიღო მევლუდ წულუკიძემ ორი თვის წინ. სია არის 2016 წლიდან. დარეგისტრირებულია რეესტრში, მე უფლება არ მაქვს ცვლილებები შევიტანო. 30 ადამიანი გამოცხადდა და 26 ხმა მომცა“- განაცხადა ანზორ ლაზიშვილმა.
ავტორი: ნაირა ქობულაძე
