აჭარის უმაღლეს საბჭოში ფრაქცია „ერთიანი ნაციონალური მოძრაობა“ რიგგარეშე სესიას ბოიკოტს უცხადებს.
„ერთიანი ნაციონალური მოძრაობის“ წევრი ელგუჯა ბაგრატიონის განცხადებით, მმართველმა გუნდმა 8 მარტის შეთანხმება დაარღვია.
„თავდაპირველად ინიცირებული იყო კანონპროექტი არჩევნების სრულად პროპორციული სისტემის შემოღებასთან დაკავშირებით, საკონსტიტუციო ცვლილებები ითვალისწინებს საყოველთაო განხილვებს და სწორედ სრულ პროპორციულ სისტემაზე გადასვლასთან დაკავშირებული ცვლილებების განხილვა მოხდა, შემდეგ შეიცვალა კანონპროექტი და სამი მაჟორიტარი დარჩა, ანუ განიხილეს სხვა პროექტი და ახლა კენჭი უნდა უყარონ სხვას, ესაა კანონდარღვევა“, – განაცხადა ფრაქცია „ნაციონალური მოძრაობის“ თავმჯდომარემ ელგუჯა ბაგრატიონმა.
მმართველ გუნდი აცხადებს, რომ ოპოზიცია გიორგი რურუას გათავისუფლებას ითხოვს და ისინი თავიდანვე არ იყვნენ პროპორციული არჩევნების მომხრე.
„ისინი პროპორციული არჩევნების მომხრე არ იყვნენ არც მათი ხელისუფლებაში ყოფნის პერიოდში და არც ახლა. ისინი გადაიქცნენ ბოლშევიკებად და ვერ იტანენ განსხვავებულ აზრს. ისინი ითხოვენ კრიმინალური წარსულის მქონე რურუას გათავისუფლებას, ეს მათი არჩევანია, იქნებიან კრიმინალის თუ ქვეყნის განვითარების მხარდამჭერები“, – განაცხადა აჭარის უმაღლესი საბჭოს დეპუტატმა ლადო მგალობლიშვილმა.
შეგახსენებთ, რომ დღეს პარლამენტის შემდეგ საკონსტიტუციო ცვლილებების შესახებ დღეს აჭარის უმაღლეს საბჭოს რიგგარეშე სხდომაზე ხმათა უმრავლესობით 18/3-ზე საარჩევნო მოდელი დაამტკიცეს.
ავტორი: ნაირა ქობულაძე
