აშშ-ს პრეზიდენტის, ჯო ბაიდენის განცხადებით, მან ჩინეთის პრეზიდენტს, სი ძინპინს ნათლად განუმარტა, რომ აშშ ჩინეთს სამართლიანი და კონკურენტუნარიანი ვაჭრობისთვის საერთაშორისოდ აღიარებული წესების დაცვას სთხოვდა. ინფორმაციას Reuters-ი ავრცელებს.
ბაიდენის თქმით, როდესაც ის ობამას პრეზიდენტობის დროს, ვიცე-პრეზიდენტის ამპლუაში სი ძინპინს საათობით ესაუბრებოდა, დარწმუნდა ჩინეთის პირველ პირს ღრმად სჯეროდა, რომ დემოკრატიას მომავალი არ აქვს.
„ის ერთ-ერთი ისეთი ადამიანია, პუტინის მსგავსად, რომელიც მიიჩნევს, რომ ავტოკრატია მომავლის ტალღაა, დემოკრატია კი ამ რთულ სამყაროში ვერ იფუნქციონირებს. მას არ სჯერა დემოკრატიის, მაგრამ ის ძალიან ჭკვიანია“,- განაცხადა ბაიდენმა.
აშშ-ს პრეზიდენტის განცხადებით, როდესაც ჩინეთის პირველმა პირმა მას არჩევნებში გამარჯვების მისალოცად დაურეკა, მან სი ძინპინს შემდეგი რამ უთხრა:
„სანამ შენ და შენი ქვეყანა ადამიანის უფლებების დარღვევას განაგრძნობთ, ჩვენ ყველაფერს გავაკეთებთ, რათა მსოფლიოს ყურადღება ამ საკითხებისკენ მივაპყროთ და ნათლად დავანახოთ რა ხდება. ის მიხვდა, რასაც ვეუბნებოდი“.
