ბათუმში 21-ე საარჩევნო უბნის მიმდებარე ტერიტორიაზე მოქალაქეებს შორის დაპირისპირება მოხდა.

როგორც თვითმხილველი „პრაიმტაიმნიუსს“ უყვება, ერთმანეთს „ერთიანი ნაციონალური მოძრაობის“ აქტივისტები და მმართველი პარტიის მხარდამჭერები დაუპირისპირდნენ.

„უბანთან სამარშრუტო ტაქსი იდგა, სავარაუდოდ „ქართული ოცნების” მხარდამჭერები ისხდნენ იქ. რაღაც სიები ჰქონდა იქ მყოფ ერთ-ერთ ქალს. ერთი ახალგაზრდა ამ ყველაფერს ტელეფონით იღებდა. იმ ქალბატონმა ტელეფონის წართმევა დაუპირა და ჩხუბი დაიწყეს. პოლიციამ ორი პირი წაიყვანა. ის ქალბატონი ყვიროდა, მე ვარ დაზარალებული, ხელი მაქვს დაზიანებულიო“, – აცხადებს თვითმხილველი.

როგორც „პრაიმტაიმნიუს“ შინაგან საქმეთა სამინისტროში განუცხადეს დაკავებულია ორი პირი წვრილმანი ხულიგნობისთვის.

166 მუხლი, წვრილმანი ხულიგნობა, ორი პირია დაკავებული, შსს დაადასტურა

დღეს, 31 ოქტომბერს საქართველოში საპარლამენტო არჩევნები მიმდინარეობს. ამომრჩეველთა ერთიან სიაში სულ 3 205 634 ამომრჩეველია რეგისტრირებული. ქვეყნის მასშტაბით გახსნილია 3 657 საარჩევნო უბანი. იმ ამომრჩევლებისთვის, რომლებიც იმყოფებიან სამკურნალო დაწესებულებებში, კარანტინსა და თვითიზოლაციაში, ცალკე დამატებით შეიქმნა 127 სპეციალური საარჩევნო უბანი.

არჩევნებში 48 პოლიტიკური პარტია და ორი საარჩევნო ბლოკი მონაწილეობს.

ყველა ინფორმაცია საპარლამენტო არჩევნებთან დაკავშირებით ნახეთ ამ ბმულზე

ავტორი: ნაირა ქობულაძე