დაავადებათა კონტროლის ცენტრის ხელმძღვანელის, ამირან გამყრელიძის განცხადებით, ბათუმის ბულვარში ორი კარავი დაიდგმება, სადაც მოქალაქეები კორონავირუსზე ტესტირებას შეძლებენ.

„დიდი ალბათობით, ხვალიდან მოხდება აღწერა რამდენი ღამის კლუბი, ბუნგალოა აჭარაში და ყველას სავალდებულო ტესტირება დაიწყება. ასევე, ვმუშაობთ საკითხზე, რომ ბათუმის ბულვარში დაიდგას ორი კარავი და ნებაყოფლობით შევთავაზოთ ადამიანებს ტესტირება, რადგან გვქონდეს ინფორმაცია აჭარის რეგიონში ინფექცია ტრიალებს თუ არა, ანუ ამ რეგიონში რანდომული ტესტირება“, – განაცხადა გამყრელიძემ.

დღეს საქართველოში კორონავირუსის 10 შემთხვევა დადასტურდა, აქედან 3-ის წყარო დაუდგენელია, 1 ლენჯერის კლასტერს განეკუთვნება, 4 დადასტურებული შემთხვევის კონტაქტია, ორი კი იმპორტირებული შემთხვევაა.

საერთო ჯამში საქართველოში კორონავირუსის 1361 შემთხვევაა რეგისტრირებული, მათგან გამოჯანმრთელდა 1098 ადამიანი, ხოლო გარდაიცვალა 17.