ბათუმის საერთაშორისო საუნივერსიტეტო ჰოსპიტალის დასუფთავების სამსახურის თანამშრომელს კოვიდ 19 დაუდასტურდა. როგორც კლინიკაში აცხადებენ, ინფიცირებული პირი სამედიცინო პერსონალს არ მიეკუთვნება.
ის ყოველ მეოთხე დღეს მუშაობდა და შეხება არ ჰქონდა არც პაციენტებთან და არც მედპერსონალთან. ინფიცირებულთან კონტაქტში მყოფი ყველა პირი გამოვლენილია და იზოლაციაში იმყოფება.
ტესტირება ჩაუტარდა სამედიცინო პერსონალს. ჰოსპიტალის შენობაში ჩატარდა სრული დეზინფექცია. ამჟამად ჰოსპიტალის ყველა სამსახური ჩვეულ რეჟიმში აგრძელებს მუშაობას. „ჩვენ ყოველთვის უდიდესი პასუხისმგებლობის გრძნობით ვასრულებდით და ვასრულებთ დაკისრებულ მისიას – ადამიანის ჯანმრთელობის დაცვას.
ყველაფერს ვაკეთებთ იმისათვის, რომ ჩვენს პაციენტებსა და პერსონალს უსაფრთხო გარემო შევუქმნათ.“- ნათქვამია კლინიკის მიერ გავრცელებულ განცხადებაში.
ავტორი: ნაირა ქობულაძე
