ხელვაჩაურის მიმართულებით მოძრავი მიკროავტობუსების მძღოლები მგზავრობის ტარიფის გაზრდის მოთხოვნით  მესამე დღეა გაფიცული არიან და არ მუშაობენ.
მძღოლებმა დღეს აჭარის ტელევიზიასთან გამართეს აქცია და პირდაპირ ეთერს ითხოვდნენ. როგორც ისინი აცხადებენ, სურთ მოსახლეობამდე სწორი ინფორმაცია მიიტანონ.

„ჩვენ ვითხოვთ, რომ ხელისუფლებამ გაიგოს ჩვენი პრობლემა და ისე გაკეთდეს, რომ არავინ არ დაზარალდეს, არც ჩვენ.და არც მოსახლეობა. სოციალურ ქსელებში შეურაცხყოფას გვაყენებენ. ყველას ოჯახი გვყავს, პური ხომ უნდა მივუტანოთ ბავშვებს. ჩვენი პროტესტი არ შეწყდება, ჩვენი მდგომარეობაც უნდა გაითვალისწინოს მთავრობამ. ამიტომ გვინდა მივაწოდოთ სწორი ინფორმაცია მოსახლეობას. სოციალურ ქსელში წერს ბევრი, გვლანძღავენ ჩვენ, ამ გაჭირვებაში რა დროს მგზავრობის ფასის მომატებააო. ამიტომ გვინდა სწორად მივაწოდოთ ინფორმაცია, ჩვენც გაგვიძვირდა ყველაფერი, საწვავი, ავტომანქანის სათადარიგო ნაწილები, ბევრი ქუჩა ცალმხრივი გახდა. შედით ჩვენს მდგომარეობაშიც. ჩვენც გვაქვს ბანკის დავალიანება, ვალები, ბევრი საზრუნავი და პრობლემა. ზარალზე ვმუშაობთ დღეს და  წამგებიან მდგომარეობაში ვართ“ – აცხადებენ აქციის მონაწილეები.

მოგვიანებით აქციის მონაწილეებმა კვლავ ბათუმის მერიასთან გადაინაცვლეს და ბათუმის მერის მოვალეობის შემსრულებელ არჩილ ჩიქოვანთან შეხვედრას ითხოვენ.

როგორც ბათუმის მერიის საქალაქო ტრანსპორტისა და სატრანსპორტო ინფრასტრუქტურის პოლიტიკის განყოფილების უფროსი ემზარ ქავჟარაძე აცხადებს, ხელვაჩაურის მიმართულებით სამი ავტობუსი დაინიშნა, რამაც მგზავრობის პრობლემა მოაგვარა.

„პირველ რიგში მინდა ბოდიში მოვუხადო მოსახლეობას, რომ შეექმნათ შეფერხებები გადაადგილებაში. მერიამ და ავტოტრანსპორტმა ყოველდღიურად სამი ავტობუსი დაამატა ხელვაჩაურის მიმართულებით და მგზავრობის პრობლემა მოგვარდა.
რაც შეეხება გზავრობის საფასურის მატებას, ჩვენ წერილობით მოგვმართა არა მარტო ხელვაჩაურის მიმართულებით მოძრავი მიკროავტობუსების წარმომადგენლებმა, არამედ სხვადასხვა კომპანიებმა, რომლებიც ქალაქის ტერიტორიაზე მოძრაობენ.
ამ ეტაპზე მიმდინარეობს მოკვლევა, შესწავლა თუ რა შესაძლებლობები გააჩნია მუნიციპალიტეტს და რა დახმარება შეგვიძლია ჩვენ. ეს ყველაფერი გადაეგზავნება შემდეგ საკრებულოს“, – აცხადებს ემზარ ქავჟარაძე.

აქციის მონაწილე მძღოლებს ბათუმის მერიის ადმინისტრაციის წარმომადგენლები შეხვდნენ. შეხვედრა დაახლოებით ერთი საათის განმავლობაში მიმდინარეობდა. თვითმმართველობის წარმომადგენლების ინფორმაციით, მძღოლების მოთხოვნების შესწავლისა და პასუხისთვის 10 დღიანი ვადა ესაჭიროებათ.

„მუნიციპალიტეტის მხრიდან იყო შეთავაზება, რომ 10 დღის ვადაში მოხდებოდა ამ საკითხის მთლიანად შესწავლა. ახლა მიმდინარეობს ამ საკითხზე მუშაობა, ეს არის ფასის დადგენა, სუბსიდირება თუ სხვა საკითხები. ეს ყველაფერი უნდა წარედგინოს საკრებულოს და საკრებულომ უნდა მიიღოს გადაწყვეტილება. საკითხის შესწავლა ყველა მიმართულებით მიმდინარეობს. გვინდა რეალური და სრულყოფილი დასკვნა წარვადგინოთ და ამისთვის მოვითხოვეთ 10 დღიანი ვადა”- აცხადებს ემზარ ქავჟარაძე.

მძღოლებისთვის მერიის პასუხი მიუღებელი აღმოჩნდა და აცხადებენ, რომ შეხვედრით უკმაყოფილო არიან, რადგან კონკრეტული დაპირებები ვერ მიიღეს.

„მსგავს დაპირებებს წლებია ვისმენთ, მაგრამ ქმედითი ნაბიჯები არ გადადგმულა. ამიტომ ვრჩებით ბოიკოტის რეჟიმში და სამუშაოს არ დავუბრუნდებით, სანამ საკრებულო რეალურ გადაწყვეტილებას არ მიიღებს. დაახლოებით 150 მძღოლი ვართ გაფიცული. როგორც ვატყობთ, ისევ ჩვენს მოტყუებას აპირებენ. ვიქნებით კიდევ 10 დღე გაფიცული და არ ვიმუშავებთ- აცხადებენ მძღოლები.

ავტორი: ნაირა ქობულაძე