გუშინ, ბათუმში კომენდანტის საათის დროს გამართულ დაუმორჩილებლობის აქციაზე დაკავებული 11 პირიდან ორი ხელწერილის საფუძველზე გაათავისუფლეს.
გათავისუფლებულთაგან ერთ-ერთი არასამთავრობო ორგანიზაცია „ალტერნატივას” ხელმძღვანელი ხათუნა ბერიძეა.
როგორც ხათუნა ბერიძემ „პრაიმტაიმნიუსთან” განაცხადა, „ალტერნატივას” წევრები გუშინ აქციაზე არ იმყოფებოდნენ.
„მხოლოდ მე ვიყავი აქციაზე. ჩემი ორგანიზაციის წევრები არ იმყოფებოდნენ ჩემთან ერთად. სპონტანურად დაიგეგმა. სხვადასხვა სამოქალაქო აქტივისტი თუ უბრალოდ ბათუმელები გამოვიდნენ. გუშინ გვიან ღამით გაგვათავისუფლეს ორი ქალი, დანარჩენები სასამართლოს ელოდებიან”- აცხადებს ხათუნა ბერიძე.
დაკავებულების სასამართლო პროცესი დღეს გაიმართება.
შეგახსენებთ, თბილისში მიმდინარე დაუმორჩილებლობის მარშის პარალელურად ბათუმშიც გაიმართა აქცია. სამოქალაქო აქტივისტები კომენდანტის საათის დროს ქუჩაში გადაადგილდებოდნენ, მსვლელობით დაწესებულ შეზღუდვებს აპროტესტებდნენ და ფეისბუქლაივით მოქალაქეებს გარეთ გამოსვლისკენ მოუწოდებდნენ.
პოლიციასა და აქციის მონაწილეებს შორის სიტყვიერი და ფიზიკური დაპირისპირების შედეგად 11 პირი ადმინისტრაციული წესით დააკავეს, მათ შორის ფირუზ წულუკიძე და ხათუნა ბერიძე. მათ სახელს ბათუმში არაერთი ხმაურიანი აქცია უკავშირდება.
ავტორი: ნაირა ქობულაძე
