ბათუმში, შარაშიძის ქუჩაზე მცხოვრებლებმა გზა გადაკეტეს. აქციის მონაწილეები სასმელ წყალთან დაკავშირებულ პრობლემებზე საუბრობენ. როგორც ადგილობრივები აცხადებენ, ბოლო რამდენიმე დღის განმავლობაში ქუჩის მცხოვრებლები იწამლებიან. აქციის მონაწილეები ვარაუდობენ, რომ ინტოქსიკაციის მიზეზი სასმელი წყალია, რადგან ქსელი დაზიანებული და დაბინძურებულია.
ადგილობრივების განცხადებით, 2 ადამიანი ინფექციურ საავადმყოფოშია მოთავსებული, ხოლო ერთი მცირეწლოვანი ბავშვი დედათა და ბავშვთა ცენტრში.
“მდგომარეობა ყველასი საშუალო სიმძიმისაა, მძიმე არც ერთი არ არის, ყველას ესაჭიროება ჩარევა, ინკლუზიური თერაპია. ჩივილები პრაქტიკულად იდენტური აქვთ, ეს არის ტემპერატურის მატება, გულისრევა, მუცლის ტკივილი და დიარეა. სულ არის 9 პაციენტი, ორი არასრულწლოვანია, 18 წლამდე. სანამ არ იქნება დასკვნა ვერავინ ვერ იტყვის რისგან არის. მე შემიძლია გითხრათ რომ ეს არის ნაწლავური ინფექცია. და რა დადასტურდება უკვე კვლევების შედეგად, ეს უკვე ჩვენი პრეროგატივა არ არის “, – განაცხადა ბათუმის ინფექციური საავადმყოფოს კლინიკურმა მენეჯერმა დავით მურვანიძემ.
ადგილზე აჭარის ჯანდაცვის მინისტრის მოადგილე ნინო ნიჟარაძე მივიდა.
როგორც „ბათუმის წყალში“ აცხადებენ, ისინი მომხდარზე პასუხისმგებლობას ვერ აიღებს.
„ბათუმის წყალს აღნიშნულ დასახლებაში ქსელი არა აქვს და არც აბონენტები არ ჰყავს, შესაბამისად აღნიშნულ ფაქტზე ბათუმის წყალი პასუხისმგებლობას ვერ აიღებს”,- აცხადებენ შპს „ბათუმის წყალში“.
სურსათის უვნებლობის სამსახურის თანამშრომლებმა სასმელ წყალის სინჯები უკვე აიღეს. სწორედ ლაბორატორიული კვლევის შემდეგ გაირკვევა არის თუ არა ვარგისი სასმელი წყალი, რომელიც ბათუმში, შარაშიძის ქუჩაზე მცხოვრებლებს მიეწოდებათ.
