„ოპოზიციური პარტიები, რომლებიც პარლამენტში აირჩიეს და არგუმენტების გარეშე არ შემოდიან, შეიძლება ითქვას, რომ სააკაშვილის თამაშს თამაშობენ, მის ნებას ემორჩილებიან და არა ამომრჩევლის“,- ამის შესახებ უმრავლესობის წევრმა, ბექა დავითულიანმა განაცხადა.

როგორც უმრავლესობის წევრი ამბობს, პარლამენტში შესვლა ერთგვარი ტესტია, ვინ არის დამოკიდებული „ნაციონალურ მოძრაობაზე“.

„ზეწოლაა იმასთან დაკავშირებით, რომ საქართველოს პარლამენტში ვერ და არ შევიდნენ და არ აღასრულონ ნება, რომელიც ამომრჩეველმა 31 ოქტომბერს გამოხატა. ეს ერთგვარი ტესტია, ვინ რამდენად დამოკიდებელია „ნაციონალურ მოძრაობაზე“ და იმედია, ამ ტესტს ვიღაცები ჩააბარებენ.

რაც შეეხება კონკრეტულად გიგა ბოკერისთან პრეტენზიებს ოპოზიციის ნაწილის მხრიდან, ეს ჩემი საქმე ნამდვილად არ არის, თუმცა გასაგებია, რატომ არ უნდა ბოკერიასა და სააკაშვილს პარლამენტში შესვლა და კონსტრუქციული პროცესი. ვერც ერთი და ვერც მეორე, როგორც ლიდერები, პარლამენტში ვერ ხვდებიან. მათთვის სულერთია მათი რიგითი წევრები, მაგალითად, არმაზ ახვლედიანი მოხვდება თუ არა პარლამენტში. ამომრჩეველმა დააფიქსირა, რომ ახალ ძალებს აქვთ შანსი განვითარების, ყოველგვარი სამართლებრივი, პოლიტიკური და რაციონალური ლოგიკის მიღმა არგუმენტების გარეშე ვიღაცები მაინც უარს ამბობენ პარლამენტში შემოსვლაზე, ეს იმას ნიშნავს, რომ მათზე არის სხვა ტიპის ზეწოლა, ბულინგი თუ მორალური შანტაჟი, რის გამოც ისინი ამ პლატფორმების ზეგავლენისგან გათავისუფლებას ვერ ახერხებენ“, – განაცხადა ბექა დავითულიანმა.